□ Hoz Saubangj sij Cinz Siengzcouh Liuz Gingliuj Cinz Siengzgen hoiz

60 nienzdaih, guek raeuz souh deng lai fuengmienh hangzhaep ciemqhah hongbing goenghai roxnaeuz raeblaeng haenx, daegbied dwg bi 1964 ndwen 5 gvaqlaeng, youq cingzgvang Meij、Suh song guek gyagaenj hongbing hangzhaep guek raeuz lajde, hwnjguh baihlaeng canloz (sibgvenq heuh hwnjguh “sam sienq gensez”) deng baij hwnj gij lwnhsaeh youqgaenj goengdaeuz ngoenznaengz gak gaep bae.

Ciuq gij anbaiz giva guekgya, gij dieg baihsaebaek Guengjsae, dwg dieg gvaengh “sam sienq”. Veiz Gozcingh ca ndei aen seizndei neix, camceng guekgya youq gij dieg baihsaebaek Guengjsae anbaiz buek hanghmoeg moq ndeu, ndawde miz goengloh guekfuengz, miz dietloh, caemhcaiq miz gij giyez cangjgvang dem. Gij hanghmoeg neix guh baenz le, gaijndei le gij yiengh baijbouh gunghyez Guengjsae, coicaenh le ginghci dieg baihsaebaek Guengjsae fazcanj, gyagiengz le gij rengz henre henzgyaiq guekgya.

Ciuhgeq hoenxciengq, dwg bingmax caengz ning, haeux nywj doengh gonq. Seizneix hwnjguh gensez, dwg gunghcangj caengz guh, dienhlig yaek miz gonq. Youq gij dieg baihsaebaek Guengjsae gyaudoeng mbouj bienh、dienhlig youh noix guh baenzlai hanghmoeg, baenzlawz gaij- gez yungh dienh dwg aen saeh laux gaenjcieng ndeu. Seizhaenx, boux goengdaeuz gaem bumwnz dienh- raemx swcigih Cai Yungjveiz daengj vunz, ginggvaq caeuq canghhag ngeixyaeng, daezok aen fueng’anq haifat Camhfatdienh Gaepmbaek Lungzgyangh.

Lungzgyangh dwg diuz dahnga cujyau Dahliujgyangh ndeu, daj gij diegbya Yienh Liboh、Yienh Sanhduh Swngj Gveicouh lae ok, riengz Yienh Nanzdanh、Vanzgyangh lae daengz Hozciz、Yizsanh, youh daj gizneix laebdaeb lae coh baihlaj, youq Cin Fungsanh Yienh Liujcwngz caeuq Dahyungzgyangh doxgap, doeklaeng lae haeuj Liujgyangh. Caeux youq 60 nienzdaih geizco, Yendagrau Dienh- raemx Guengjsae daengj danvih, gaenq guh gvaq hong maeuzveh hawj dieglae Dahlungzgyangh. Dangjveij caeuq Cwngfuj Swcigih ginggvaq ngeixyaeng lai baez, nyinhnaeuz Lungzgyangh raemx doekca sengcingz hung, deng dumh sonjsaet noix, diuzgienh haifat ndei lai, caemhcaiq lae gvaq gij dieg gyang dieg Hozciz, doiq gaijgez hwnjguh “sam sienq gensez” yungh dienh mizleih, yienghneix couh gietdingh yungh aen fueng’anq haifat Camhfatdienh Gaepmbaek Lungzgyangh neix.

(caengz sat)