Youq danhvei saehnieb ndawde, lauxsae moix bi miz baez bingz cizcwngh ndeu, baez neix youh daengz lo. Neix hawj gou siengj daengz laux Vangz.

Laux Vangz itcig cungj guh gijsaeh bauq bingz cizcwngh gauhgiz cunghyoz lauxsae. Hoeng, 11 bi gvaqbae lo, cungj bingz mbouj ndaej.

Bi’gvaq hainduj, gij vwnzgen gvendaengz lauxsae cungh siujyoz bingz cizcwngh youh roengzdaeuj moq, laux Vangz sikhaek daeuj daengz bangunghsiz yaucangj bauqmingz, de yaek bauq gij cizcwngh gauhgiz cunghyoz lauxsae. Siuj Vangz boux youq bangunghsiz haenx couh caeuq de gangj riu:“Laux Vangz ah laux Vangz, gou dwg vih mwngz ndei cij naeuz gij vah neix, gou gienq mwngz gij cizcwngh neix mwngz couh mbouj yungh bingz lo. 11 bi neix daeuj, mwngz bibi lumj dozcaengh doek roengz raemx bae—— fouz mbouj hwnj bw. Mwngz lijdwg mbaetmbaet 800 maenz ngaenzbauqmingz neix bae cawx di ien cit roxnaeuz bae cawx geij bingz laeuj daeuj gwn cixbah. Danghnaeuz mwngz hawj dou cit gij ien mwngz、gwn gij laeuj mwngz, doeklaeng bungq daengz miz gijmaz saeh le, dou lij rox vih mwngz gangj gij coenz vah ndei bw. ”

Laux Vangz lumj faexcenzreiz nei, rumz ci hix mbouj ning, fwn doek hix mbouj dumz, byaj raez hix mbouj lau. Seizneix, laux Vangz ngiengx- gyaeuj hawjdaeuj, naeuz:“Gij ngaenz- bauqmingz gou hix rox dwg 800 maenz ngaenz a! Hoeng, ce gij ngaenz neix roengzdaeuj gou hix mbouj fouq daengz gizlawz bae, vanzlij dawz bae bungqbungq seizheiq ba! Gangj mbouj dingh bineix gou seizheiq ndei, ndaej bingz hwnjbae!” Caen dwg ngwn lai lo, caen dwg hozoiq lai lo, lienz boux lwgnyez 3 bi cungj mbouj naeuz gij vah de deng, gou ndawsim baenzneix ngeix.

“Neix mbouj dwg bungq seizheiq lwi? Bingz cizcwngh lij aeu bungq seizheiq? Laux Vangz a laux Vangz, mwngz caen dwg faexnduk gaek mbouj baenz gij huqndei……” Gou danq gaemz heiq raezraez ndeu, dawz gonj bit he youq gwnz daiz, naeuz:“Mwngz miz geij aen diuzgen mbouj habgek: Daih’it, geijcib bi neix daeuj, gij cwngzciz mwngz itcig cungj mbouj ndei geijlai, gij ban mwngz son cungj baiz youq baihlaeng; daihngeih, mwngz sij gij cungjgez caeuq lwnvwnz lumj boux lwgnyez doeg siujyoz sij nei. Mwngz mbouj miz bien lwnvwnz lawz ndaej dwngh okdaeuj gvaq, engq mbouj yungh gangj sigiz、swngjgiz、guekgyagiz; daihsam, mwngz diuh daengz cunghyoz raeuz, daengz seizneix, lienz swhgwzcwng cunghyoz lauxsae cungj mbouj miz, neix dwg diuz ceiq youqgaenj lo! Mbouj yungh gangj gijwnq lo. Mwngz son saw mauhgvaq 30 bi lo, coengzlaiz mbouj camgya saek baez goqgoeng’hai gvaq! Youq aen yienh raeuz mbouj miz vunz rox gij mingzcoh mwngz……” Gou caeuq siuj Vangz gangj le, laux Vangz deng gij vah dou moeb ndaej mwnh liux, lumj faexgoek nei ndwn youq henz.

Raen laux Vangz baenzneix, laux Lij yawj mbouj roengzbae lo, lienzmuengz daeuj bang de gangj vah, de naeuz:“Siuj Veiz, mbouj yungh yienghneix gangj ma! Gyoengq gwzming dungzci raeuz aeu fazyangz gij cingsaenz——it mbouj lau haemzhoj, ngeih mbouj lau mingh dai; lajmbwn mbouj miz maz saeh nanz, cij lau bouxvunz yunghsim bae guh. Lij miz dem, saetbaih ndaej roxhit bw !”

Gou hix naeuz:“Laux Vangz a! Gou mbouj dwg daegdaengq siengj  gig aensim mwngz. Gizsaed, gou dwg bouxvunz aenbak lumj fagmid, aendungx lumj gaiq daeuhfouh! Mwngz mbouj yungh siengj lai!”

Laux Vangz doq riu dwk naeuz:“Gou rox gou rox, gij vah siuj Veiz dwg vahsaed. Mwngz yawjyawj bouxwnq, aeu vwnzbingz miz vwnz- bingz, aeu yozliz miz yozliz, aeu swhgwzcwng lauxsae miz swhgwzcwng lauxsae. Cij caj seizgan baez daengz, gyoengqde couh ndaej bingz hwnjbae lo. Hoeng, yienznaeuz gou yaek duiyouh, gou lij siengj caiq bungqbungq seizheiq, bae bingz aen cizcwngh daeuj yawjyawj……”

(caengz sat)