Naeng humz mbouj ndaej gaeu. Seizdoeng aenvih dienheiq hawqsauj gamjdaengz daengx ndang humzswdswd seiz, ciengeiz mbouj ndaej yungh fwngz gaeu de, mboujnex naeng deng gaeu sieng le couh baenz ganjyenj. Fuengzceih fuengfap dwg lai gwn raemx caeuq byaekheu、lwgmak, noix gwn gijgwn manhsoemj, gaej gwn laeujget, gaenx caemxndang, gaenx rieg buhndaw.

Gen ga gyoet mbouj ndaej ring feiz. Seizdoeng gen ga ciengzseiz loh youq baihrog, sailwed sousuk、lwed lae baedauq gemjnoix, danghnaeuz sikhaek ring feiz, rox hawj sailwed doenghmeg saek lwed. Ndigah, gen ga gyoet seiz ceiq ndei dwg yaengyaeng nucat, hawj de menhmenh hoizfuk cingqciengz vaendoh.

Naengbak dekleg mbouj ndaej riz. Ndaej yungh raemxndat daeuj swiq seuq, doeklaeng led di gaucij he.

Mbouj ndaej hoet youq ndaw ranz mbouj ok dou. Danghnaeuz mbwn nit cix haep dou gven cueng hoet youq ndaw ranz, ndaw ranz rom miz haujlai faenx, hoengheiq uqlah oepsoep, vunz couh yungzheih ndaej bingh. Ndigah, seizdoeng aeu habdangq hai dou hai cueng doeng rumz, gemjsiuj binghdoeg nengzbingh youq ndaw ranz sanj maj, ndaej yawhfuengz baenz liuznauj caeuq liuzganj、mazcinj daengj bingh. Ceiq ndei dwg ok rog ranz daeuj byaijbyaij, dak ndit roxnaeuz sup aeu hoengheiq singjsien, yiengh- neix doiq ndangdaej gengangh daih miz ndeicawq.