Nitgyoet caeuq dumzmbaeq doxgap doxbuenx daeuj seiz, rox cauhbaenz sailwed naengnoh fatyiemz, baeznit couh gaenriengz daeuj lo. Baeznit caeuq dekleg mbouj doengz, de dwg aenvih naengnoh ciengzgeiz roxnaeuz yaepseiz loh youq ndaw nitgyoet dumzmbaeq vanzging lajde habbaenz.

Baenzlawz fuengzceih de ne? (1) Bohmeh wng haeujsim youq ndaw gijgwn ngoenznaengz lwgnyez demgya di gijgwn hamz veizswnghsu caeuq youzlauz lai he hawj lwgnyez gwn, lumj cijvaiz、nohmou cing、hakgyaeq、bwtdaep doihduz、lauxbaeg nding daengj. (2) Ok rog bae cunz seiz, aeu haeujsim giz yungzheih hwnj baeznit de, lumj cikfwngz、cikdin caeuq fajnaj, caengz okbae gaxgonq sien led di ywhohnaeng ndeu, caemhcaiq naenx fajnaj lwgnyez yaep ndeu, daiq madfwngz caeuq daenj haizbaengz hawj lwgnyez le caiq okdou.