Gijgwn ndaej yawhfuengz binghnyouhdangz miz:

1、Duhhenj caeuq byaek- gathau.

Guhfap: Aeu 60 gwz duhhenj, 45 gwz byaekgathau sauj baek raemx gwn.

Gij caucaujganh ndaw duh- henj ndaej caeuq youzlauz ndaw ndang vunz giethab, soj hamz miz gij lonjlinzcij de ndaej siucawz danjgucunz nem youq bangx sailwed haenx, caemhcaiq ndaej fuengz youzlauz yaemz youq ndaw daep daiq lai. Byaekgathau ndaej siu ndat leih nyouh、siu foeg gej doeg. Aen dan neix hab yungh youq daep lauz lai、ganhyenz caeuq binghnyouhdangz.

2、Byaekginzcai cauj raet- rang.

Guhfap: Aeu 400 gwz byaek- ginzcai, 50 gwz raetrang, gyu、meiq、mba sauj、ciengqyouz、veicingh gak di he.

Aen dan neix ndaej bouj heiq ik dungx、vaq myaiz leix heiq, ndaej gyangq hezyaz、dingj baenzaiz、gyangq hezdangz、gyangq hezcij caeuq daezsang menjyiz goengnaengz, hab yungh youq binghdoegsingq ganhyenz、daep lauz lai、binghnyouhdangz caeuq doenghmeg giet ndongj.

3、Maksanhcah caeuq noh.

Guhfap: Aeu 200 gwz noh galaeng mou, 100 gwz sanhcah gep, 30 gwz lwgcid, 2 aen gyaeqgaeq hau, 15 gwz denfwnj, 15 gwz mbamienh, 30 gwz begdangz, 50 gwz youzdoenghgo, gyu、veicingh caeuq raemx gak di he, dwk youz cauj gwn.

Aen dan neix ndaej nyinh yaem cangq mamx、sek dungx siu cwk, ndaej gyangqdaemq danj- gucunz、hezyaz sang、leih nyouh、caemcingx, ndaej yungh youq boux hezcij sang、boux hezyaz sang、boux baenz gvanhsinhbing、boux baenz dungxraeng、boux daep lauz lai daengj vunzbingh.