Mboengqneix, Cungguek Ndaw- biengz Vwnzyi’gyah Hezvei ok sawvwnzgen aeu aen cwngheuh ndei “gizdieg minzsuz bak ciet Cungguek” hawj Yungzsuij Myauzcuz Swciyen. Yungzsuij dwg dieggyae diegbya saujsu minzcuz Myauzcuz guhcawj he, daengx yienh gak minzcuz conzdungj ngoenzciet fungfouq, minzcuz ndawbiengz ngoenz- ciet lai daengz 130 lai aen, ceiq miz daiqbiuj dwg Myauzcuz ciet aenvenz maxdoxdik、 Yauzcuz ciet Buenz- vuengz、 Bouxcuengh cietfwen sam nyied sam daengj.

Vih baujhoh caeuq swnjcienz minzcuz ngoenzciet vwnzva, Yungzsuij yungh lai cungj banhfap, gaenxmaenx cujciz minzcuz ndawbiengz ngoenzciet caeuq vunzlai vwnzva hozdung, guhbaenz le ciengzdai moq “cwngfuj doidoengh、 ndawbiengz bangcoengh、 vunzlai camgya、 coicaenh hwngfat、 doxgiet huzndei”. Yungzsuij minzcuz ngoenzciet hozdung cungj dwg gij cujciz ndawbiengz gagnyienh heuh banh, gagrox camgya, ngoenzciet minzsuz faenbouh gvangq, fungcingz daegbied. Youq seiz bohoih caeuq ngoenzciet hozdung, Bya’myauz gak cuz beksingq naeksim gyalai vwnzva doxgyau, minzcuz doxgiet caeuq doengzcaez hwngfat cinbu. Binaengz cousou doeklaeng, youq Yungzsuij yienhsingz banh “Cungguek·Yungzsuij Myauzcuz ciet aenvenz maxdoxdik”; binaengz banh cietfwen “sam nyied sam”; byaibi beixnuengx Myauzcuz gvaq Myauznienz、 beixnuengx Yauzcuz angqhoh “ciet Buenzvuengz”, caeqbaiq cojcoeng、 doiq fwen、 yienj dinfwngz ak daengj.

Yungzsuij“gizdieg minzsuz bak ciet Cungguek” vwnzva binjbaiz caux- laeb guhbaenz, yaek ndaej rengzrwd dwk fungfouq caeuq guh hung Yungzsuij dieg minzcuz vwnzva binjbaiz neihanz caeuq yingjyangjliz.

(Liengz Cunghyiz/梁忠于)