Duenh haenx, Vuzcouh soengq daeuj mbangj gau catheuj、genj gyoengqde gag cauh, naeuz dwg soengq hawj gij goengdaeuz swcigih sawq yungh gij huq moq gyoengqde baez ndeu, bouxboux goengdaeuz cungj baen ndaej daeh iq he. Veiz Gozcingh dangciengz senhbu: “Byawz aeu byawz yaek hawj ngaenz, raeuz cungj mbouj ndaej ciemq gij bienzngeih goenggya.” Doeklaeng caezgya cungj ciuq gij vah de guh le.

Bi 1974, Veiz Gozcingh siengj cawx dingz huq miz daegsaek Guengjsae soengq hawj baengzyoux. Ginghgunghgiz daj ndaw gij huq- yiengh giyez soengq daeuj, senj le dauq doxgaiq gwn caz swjsah Cangj Huq Naeznamh Ginhcouh guh ndeu (miz aen huzcaz caeuq seiq aen cenj iq) soengq hawj de, gangj gijhaenx dwg gij huqyiengh gunghcangj soengq daeuj, mbouj yungh hawj ngaenz. De naeuz:“Sou dwg mbouj dwg hix yienghneix caezbienh aeu huqyiengh gunghcangj a!” Doeklaeng, youz aencangj hai le mbaw fei 7.5 maenz ndeu hawj de, de cam:“Youq ndaw diemq 7.5 maenz cawx ndaej dauq doxgaiq neix lwi?” Gij dungzci ginghgunghgiz naeuz:“Cawx mbouj ndaej, neix dwg aengyaq okcangj.” De naeuz: “Sou dwg mbouj dwg lau gou mbouj miz ngaenz hawj a?” Doeklaeng youh dauqcungz hai mbaw fei gyaq soucawx vaimou 16.5 maenz ngaenz ndeu hawj de, de cij haengj sou dauq doxgaiq neix roengzdaeuj.

Haujlai gojsaeh Veiz Gozcingh mbouj sonj goeng maeuz sei, seizneix youq gij ganbu ndaw swcigih lij cienz ndaej gig gvangq.

Aenvih swcigih daj hanghmoeg、ngaenzgoek、doxgaiq daengj fueng- mienh daihlig fuzrex ginghgunghyez, gyagiengz dazyinx hong cauhguh doxgaiq ngoenzyungh, Guengjsae youq “4.5” seiz, gonqlaeng miz daihbuet cangj dangz、daemj faiq、gijgwn、ien’gienj、cauh ceij、raemx swiqsaeg habbaenz、danci、cibuh、soujbyauj daengj gunghcangj ndaej guh baenz douzcanj. Caiq gya hwnj gij giyez ginghgunghyez yienzsien youh ndaej caenh’itbouh demhung cauhguh, hongdinfwngz hix ndaej haemq vaiq mbefat, ndigah, daengz bi 1975 “gij giva 4.5” satbyai seiz, Guengjsae gihbwnj guh baenz gag baengh bonjfaenh cauh yungh doxgaiq ngoenzyungh, mbangj huq lij yinh bae bangdingj swngjrog roxnaeuz gai bae guekrog, guh ok gij gung’yen wng miz hawj guekgya.

(caengz sat)