Vihliux ndaej cungfaen baujhoh caeuq vatcimh minzcuz vwnzva, Lungzswng Gak Cuz Swciyen laebbaenz cienmonz gihgou, youq gvaengxlaengx daengx yienh haiguh feihvuzciz vwnzva yizcanj bujcaz, gungh soucomz sawfwngzcau ca mbouj geijlai 400 fanh cih, swhliu loegyaem 22 gienh, swhliu dozsiengq 287 faenh, swhliu gizyawz 35 faenh. Laebbaenz cienmonz feihvuzciz vwnzva yizcanj baujhoh cungsim, soucomz gak cungj feihvuzciz vwnzva yizcanj mingzloeg 1043 aen. Gonqlaeng okbanj le《Fwen Ndawbiengz Minzcuz》、 《Gojgaeq Ndawbiengz Lungzswng》、《Lungzswng Fungcingz》daengj saw. Okbanj doenghgij saw neix, doiq baujhoh caeuq hwngfat Lungzswng minzcuz vwnzva ndaej miz gaenxmaenx coicaenh cozyung.

Aen yienh neix lij haiguh minzcuz vwnzva haeuj hagdangz、 angqhoh ngoenzciet minzcuz hozdung、 vah minzcuz yienjgangj doxdax daengj lai cungj lai yiengh baujhoh hozdung, hawj minzcuz vwnzva ndaej swnjcienz fatyiengz. Doengzseiz, aen yienh neix aeu minzcuz vwnzva caeuq lijyouz canjnieb giethab hwnjdaeuj, guhbaenz cungj lijyouz canjnieb aeu minzcuz vwnzva guh cawj he. Gaenh geij bi neix daeuj, aen yienh neix mboujduenh okyienh gak cungj aenmbanj saujsu minzcuz miz daegsaek, yinzvwnz minzsuz gingj- gvanh gig miz daegsaek baenz le gizyunghrengz dieg saujsu minzcuz ginghci hwngfat he.

Vihliux ndaej engqgya ndei baujhoh swnjcienz feihyiz vwnzva, aen yienh neix laebbaenz le minzcuz vwnzva baujhoh caeuq hwngfat hanghmoeg cijveihbu, bued roengz cienz cienyungh, vatcimh baujhoh feihyiz vwnzva, cingj bouxciennieb daeuj son minzcuz yisuz, coicaenh minzcuz vwnzva haeuj segih、 haeuj hagdangz; aen yienh neix binaengz lij banh ciet vwnzva nazmbaeklae Lungzciz, engq dwg daezhawj aen daizheiq vih minzcuz vwnzva hwngfat doxgyau he.

(Lungz Cwng/龙 政)