Gou dwg boux lwgnyez diuqbeiz ndeu, mbouj gyaez doegsaw saek di. Daj dingq lauxsae gangj “ndaw saw miz haujlai gim, doeg ndei saw couh dwg boux vunzfouq” le, gou cij menhmenh gyaez doegsaw.

Dwg ha, lauxsae gangj ndaej mbouj loek ha. Mwngz yawj Mauz cujsi hungmbwk, daj iq couh gyaez doegsaw, couhcinj youq hoenxciengq seiz, de hix ra ok seizgan daeuj doegsaw, couhcinj mwh hoenxciengq senjdeuz, yaek dawz cungqbauq naekgywg vut bae seiz, de hix mbouj haengj vut gij sawyo de. Lij miz Cangh Haijdiz dahcej, de gig gyaez doegsaw, de daj iq couh byaij loh mbouj ndaej, mbouj ndaej haeuj- hag doegsaw. Hoeng de coengzlaiz mbouj vut doegsaw bae gvaq, de swhgeij youq ranz hagsib, doeklaeng baenz boux cozgyah mizmingz ndeu……

Haujlai haujlai gojgeq gyaez doegsaw son gou dauhleix guh vunz, hawj gou engq gyaez hwnj doegsaw lo.

Geiq ndaej miz baez ndeu, gou bae suhden yawj saw, gou yawjraen bonjsaw《Gwzlinz Dungzva》, couh aeu daeuj yawj, gou baez yawj couh haeujmaez lo. Hojsik youq ndaw suhden yawj saw seizgan daiq dinj, mbouj ndaej yawj sat. Gou siengj cawx bonj saw neix, hoeng gou mbouj miz cienz.

Daj suhden dauqma, gou siengj ok aen banhfap ndeu: Bae gip huqfeiq daeuj gai. Gangj guh couh guh, gou sikhaek gaem aen daehndaij okdou, bae gip huqfeiq. Yienghneix gou laebdaeb gip sam aen singhgiz le, gou dawz huqfeiq bae gai, gai ndaej cib maenz ngaenz, cingq ngamj gaeuq cawx bonj saw haenx.

Gou bae suhden cawx bonjsaw《 Gwzlinz Dungzva》, ma daengz ranz, gou sikhaek dawz bonj saw neix okdaeuj yawj, daengz daxmeh heuh gou gwn haeux lo, gou lij sij mbouj ndaej cuengq saw roengz- daeuj

Neix couhdwg gou, boux lwgnyez daj mbouj gyaez doegsaw daengz boux lwgnyez doegsaw haeujmaez ndeu.

( 指导老师:覃红梅)