Bi 1972 ndwen 11, Veiz Goz- cingh bae Gveilinz dakdaih bouxhek guekrog, fatyienh gij rug Fanden Yungzhuz yungh cenjcaz、boemh- daeuh’ien、gij daizgwnhaeux yungh buenz、duix、geng, cienzbouh dwg gij huqngvax Gingjdwzcin. De doiq gij goengdaeuz bumwnz dakdaih caeuq gij vunzgaemhong fanden naeuz: “Bwzliuz giz raeuz guh gij huqngvax hix ndei, sou wnggai bae gizde dinghcawx, vuenh gij huqngvax gizneix sou yungh bae, gaij yungh gij huq giz raeuz guh, it fuengmienh ndaej senhconz doxgaiq Guengjsae hawj vunzhek, lingh it fuengmienh hix dwg dingjrengz hong cauhguh doxgaiq ngoenzyungh Guengjsae.”

Guengjsae lai ok gocuk, gig ndei guh dawh. Veiz Gozcingh lai baez naeuz gvaq, aeu gag cauh daeuj yungh. Hoeng, miz duenh seizgan ndeu, ndaw gih yungh dawh dwg daj swngjrog yinh haeujdaeuj. Veiz Gozcingh rox le gig hozndat, de youq baez hoih cangzveijvei gwnzde naeuz: “Raeuz miz daihbaj gocuk, vihmaz lij aeu daj swngjrog yinh dawh haeuj- daeuj yungh, nanzdauh Guengjsae lienz dawh cungj cauh mbouj okdaeuj, caen dwg luenh damzgimz!” De yiemzsuk dwk raemh naeuz baez dem: “Gvaqlaeng mbouj ndaej caiq cawx dawh baihrog, mbouj miz dawh couh yungh fwngz daeuj vax aeu.” Gij bihbingz neix, gig saenqdoengh gij dungzci gaem hong cauhguh doxgaiq ngoenzyungh, daj gwnz daengz laj, cungj engqgya gag rox leihyungh gij swhyenz bonjdieg daeuj haifat doxgaiq ngoenzyungh lo.

Veiz Gozcingh gig gvansim gij huqdoj conzdungj gih raeuz ndaej dauqfuk caeuq fazcanj. De naeuz, youq sevei gaeuq, Guengjsae miz haujlai doxgaiq dinfwngz mingzbaiz vunzlai maij haenx, gou lij iq couh rox caxbyaek Lungzcouh okmingz, raeuz aeu caenhvaiq dauqfuk gij doxgaiq conzdungj mingzbaiz neix. Caxbyaek Lungzcouh ndaej dauq- cungz swnghcanj liux, bi 1972, ginghgunghgiz daegdaengq soengq fag cax huqyiengh hawj de sawq yungh. De naeuz gunghyinz saefouq cauh fag caxbyaek dwgrengz dangqmaz, genhciz aeu hawj ngaenz. Doeklaeng cangjgya hai mbaw fei he hawj de, dwg 1.44 maenz ngaenz. De lai baez cam dwg mbouj dwg aen ngaenz neix, boux dungzci soengq fei daeuj naeuz, gwnz haw couhdwg gai aen gyaq neix. De heuh vunzranz ciuq gyaq neix hawj ngaenz le, cij nyienh aeu sou fag cax neix.

(caengz sat)