Mwh seizdoeng yawhfuengz lwgnyez hwnjhuj, banhfap ceiq ndei dwg hawj de beizyangj baenz sibgvenq gwnndoet ndei, baugvat hawj de lai gwn raemx、byaekheu caeuq lwgmak. Byaekheu caeuq lwgmak hamz miz veizswnghsu A caeuq veizswnghsu C lai, gawq ndaej demgiengz gij menjyizliz de, youh ndaej gibseiz boujcung raemx, fuengz de hwnjhuj. Lumj byaekhau、byaekginzcai、byaekvohswnj、ngaeux daengj, neix caemh dwg gij gwn cing huj. Danghnaeuz lwgnyez gaenq hwnjhuj, mboujfuengz aeuq di dang dangznae raetngaenz he hawj de gwn.

Linghvaih, couhcinj dwg seizdoeng, ndaw ranz hix aeu baujciz hoengheiq riuzdoeng ndei, gyangngoenz mbwn loq raeuj seiz lai hai cueng doeng rumz. Vaendoh ndaw ranz gaej ndat lai, itbuen baujciz youq 18 daengz 22 doh ceiq ndei. Danghnaeuz ndaw ranz daiq hawq daiq sauj, ndaej cuengq bat raemxsaw ndeu, hawj mbaeqdoh ndaw ranz youq 55% daengz 60% couh ngamj, yiengh- neix gawq ndaej baujciz hoengheiq ndaw ranz moqsak, youh ndaej fuengz nyeznomj naengnoh caeuq nemmuek conghndaeng hawqsauj.

Fap guh dang dangznae raetngaenz:

Dwk raetngaenz sauj roengz doengh aen dajcaeng bae, caiq ndingq raemx roengz cimqceh hawj de gawhbongz.

Cimq raetngaenz gawhbongz le vez hwnj swiq seuq dwk rek cawj, cawj baez daih’it sien coemh feizhaenq cawj goenj, caiq gaij yungh feiznumq cawj, doeklaeng dwk di cehmbu、noh maknganx roengz caez cawj buenq diemj cung baedauq.

Doeklaeng dwk dangznae (roxnaeuz dwk di gyu he, gaej dwk daiq lai), cawj yaep ndeu couh baenz gwn.