“Ndeu、song、sam、seiq、haj、……cien.” Hancingh cumh bak、gig yungzheih couh daj ndeu itcig geq daengz cien. Gou angq dwk riu okdaeuj, yah hix gig angq. Naj iq de yienj ok yiengh gvaigvet、simhai.

Neix dwg youq aen seizhah he, miz ngoenz gyanghaet, dou cij ngamq hwnqmbonq, song boux lwgnyez lij youq gwnz congz laep lwgda ninz. Sing meh de youq bakcauq guh haeuxcaeux cauzndiu Hancingh. Seizneix, gou yawj daeglwg ndiu lo, couh ndoj youq ndaw denz doiq Hancingh gangj: “Lwg ha, gou ngoenzneix genjcaz cingzgvang hagsib mwngz mbat ndeu, yawj mwngz ndaej mbouj ndaej vaiqvet dwk daj ndeu geq daengz cien. Boh saenq mwngz guh ndaej daengz.”

“Boh, gou guh ndaej daengz. ”

Bak iq Hancingh dap dwk gig giendingh. Seizneix, gou yungh lwgda maqmuengh cim de……De cumh bak gig raeuzred dwk geq hwnjdaeuj lo. Doeg daengz cingj bak seiz hix mbouj deng gaz mbaj.

“Guh ndaej ndei, daeglwg, mwngz caen ak!” Seizneix de riu, gou hix riu.

“Ngoenzneix, boh aeu cawj aen gyaeqgaeq ndeu daeuj dajciengj mwngz!” Gou doq naeuz doq lumh naj iq oiqemq youh nomj Hancingh. Baenq gyaeuj dauqdaeuj, gou couh hawj meh de ciuq vah gou bae guh.

Seizde, swnghhoz hojraeuh, couhcinj aen gyaeqgaeq ndeu hix dwg gig daihsaengq ha! Daegnuengx de Hanlungz lij ninz youq gwnz congz, cungj mbouj ndaej dajciengj.

Hancingh ngamq ndaej sam bi, couh rox mbangj suyoz caeuq yijvwnz gyoepyaem、cihsaw daengj, romcomz daihliengh cihsiz. Ndaej seiq bi couh hwnj it nienzgaep. Aen gyaeqgaeq he aiq ndaej gikfat sim hwnjgwnz lwgnyez, vih lwgnyez siengjmuengh hag rox cihsiz caep giekdaej, ndigah gou gamjdaengz cibfaen angqvued.

Seizneix, gaxgonq gyauyuz doiq lwgnyez yied daeuj yied ndaej bouxvunz yawjnaek. Hoeng, lij mizmbangj vunz swhsiengj gvanhnen haemq gaeuq, bohmeh mbouj rox yienghlawz hawj lwgnyez gaxgonq gyauyuz, roxnaeuz de rox hoeng mbouj nyienh bae guh; hix mizmbangj bohmeh cijdwg hawj lwgnyez gij gwn gij daenj, hagsib vwndiz mbouj haeujsim, yienghneix mbouj dwg haih lwgnyez ciuh ndeu ma! Minghyinh lwgnyez mizseiz caen dwg gaem youq ndaw fwngz bohmeh bw.