Bi 1971 ndwen 7 ngoenz 28, song lwg da de guh gvaq soujsuz haenx lij caengz ndei dauq caezcienz, de youh cingj gij goeng- daeuz ginghgunghgiz daeuj doxyaeng guhhong lo.

De naeuz, gij yenzliuh hong ginghgunghyez aeu guh youq Guengj- sae raeuz, wnggai ndaem cix ndaem, wnggai haivat cix haivat, wnggai soucawx cix soucawx. “4.5” giva geizgan, raeuz aeu ceng guh baenz doxgaiq ginghgungh gag baengh bonjfaenh gihbwnj gaijgez. Gij yenzliuh gih raeuz miz siuloh haenx aeu lai fazcanj, cawz gag gaeuq yungh le, lij ndaej caeuq gij sengj、si、swcigih beixnuengx wnq doxvuenh doxgaiq roxnaeuz gai bae guekrog. Gij doxgaiq gih raeuz mbouj miz haenx aeu guh hwnjdaeuj gonq, gij doxgaiq caengz guh ndaej baenzgoeng haenx raeuz aeu bae hag、bae caux; gij gaenq guh baenz haenx aeu daezsang cizlieng, demgya vasaek binjcungj, gyangq- daemq ngaenzgoek. Gij canjbinj cizlieng caengz gvaq ndaej gvan haenx, aeu ra ok yenzyinh, dangh- naeuz dwg sezbei、caizliuh miz vwndiz aeu habdangq bae fuzrex; danghnaeuz dwg gisuz miz vwndiz, cix baij vunz bae mbangj sengj、si maenhndei haenx hag, roxnaeuz cingj vunz daeuj son. Ginghgunghyez gaej cij banh aen ndeu, dan miz aen ndeu mbouj miz aen doxbeij cix mbouj miz doxdax. Gaxgonq Namzningz guh fanden cij miz “Fanh Guek” aen ndeu, mbouj fuengbienh vunzlai, gwn mbouj gwn cij aen dog, mbouj miz doxceng. Sou aeu ndeindei ngeixyaeng, hawj binjcungj baizbaiz doih. Gij canjciz hung haenx lumjnaeuz laeuj、dangz, aeu daihlig fazcanj. Laeuj, aeu guh laeujndei, gih raeuz ndaem baenzlai megmax, cungj siu ndaej ok di laeuj- ndei ba! Soujgunghyez aeu fazcanj, aeu daezsang cizlieng canjbinj, lumjnaeuz gij ga eijgaeu, demh gaiq gyauh hwnjbae, cix mbouj lau gyod lo, caemh mbouj rox ngad vaih dibanj dem, yienghneix cizlieng cix lai ndei di lo. Eijgaeu genjbienh ndei yungh, hab gij dienheiq dieg baihnamz, ndei gvaq gij sahfaz danzgung youh naek youh hung haenx. Gvaqlaeng couh wnggai lai ok di doxgaiq genjbienh、naih yungh、vunzlai haengj yungh haenx. Doxgaiq ngoenzyungh mbouj yungh caiq bae diegrog cawx lo, danhfanz gij doxgaiq dak vunzhek, cungj aeu yungh gij huq bonjfaenh.

Goengdaeuz Cau Bingjyenz bihaenx cawjguenj ginghgungh haenx naeuz:“Veiz Gozcingh gig yawjnaek guh hong ginghgungh, bibi cungj anbaiz dou bae gyoeblwnh song sam baez. Anh Bingzswngh、Gyauz Yauj- gvangh、Cinz Yinggih daengj goeng- daeuz caeuq gij goengdaeuz swnghcanj cijveihcuj Cinz Gaihlu、Yinz Gwnghgingh、Couh Gvanghcunh daengj vunz, saekseiz goj camgya. Gij saeh Veiz Gozcingh iugouz dou gangj haenx, doengciengz dwg gvendaengz mingzyouh canjbinj ginghgungh.(caengz sat)