Boux giyezgyah mizmingz cingq guh baugau, miz boux dingq ndeu cam:“Mwngz youq gwnz saehnieb guh ndaej baenzgoeng hungraeuh, doiq mwngz daeuj gangj, gijmaz ceiq youqgaenj?”

Boux giyezgyah mbouj cigciep dap vah, de gaem faenjbit youq hwzbanj veh aen gien ndeu, cijdwg mbouj veh liux, louz aen congh vauq ndeu. De dauqfanj cam:“Aen neix dwg gijmaz?” “Lingz.” “Aen gien.” “Saehnieb caengz guh baenz.” “Baenzgoeng.” Bouxdingq baihlaj boux dap boux han.

De doiq gij hoizdap neix mbouj doengzeiq hix mbouj fanjdoiq:“Gizsaed, aen neix cijdwg aen gawqhauh ndeu caengz veh liux. Sou cam gou vihmaz aeu ndaej cingzcik baenz hung, dauhleix gig genjdanh: Gou mbouj dawz saehcingz guh liux caez, couh lumj veh aen gawqhauh nei, itdingh yaek louz aen congh vauq ndeu, hawj bouxlajfwngz gou bae dienz nduenrim de.”

Louz congh vauq ndeu hawj bouxwnq, mbouj daibyauj swhgeij naengzlig mbouj giengz. Saedcaeq ha, neix dwg cungj coengmingz guenjleix ndeu, dwg cungj nduenrim miz daengxbuenz yisiz youh yawj ndaej engq sang he.