11 nyied 18 hauh banhaemh 8 diemj cung, Vanzgyangh Mauznanzcuz Swciyen Vahmauznanz gvangjbo densi sinhvwnz lanzmoeg youq aen yienh neix ngoenzyienhgingq cingqsik cuengqok.

Ciuq cam rox, aen yienh neix itcig yawjnaek hong gvangjbo densi senhconz, roengzrengz vih daengx yienh ginghci ndawbiengz hwngfat daengxbuenz caux ok heiqfaenh yizlun naekna. Doengzseiz, vih Mauznanzcuz daegsaek vwnzva ndaej engq ndei baujhoh、 swnjcienz caeuq hwngfat, hawj engqlai vunz roxyiuj Mauz- nanzcuz daegsaek vahgangj vwnzva goekdaej naekna, doidoengh deihfueng gak hangh hong hwngfat, aen yienh neix dangjveij、 cwngfuj guh le anbaiz, gietdingh youq yienh gvangjbo densidaiz haibanh 《Sinhvwnz Vahmauznanz》 lanzmoeg. Geij ngoenz daeuj, ginggvaq lai fuengmienh bangcoengh caeuq boux guhhong saeqsim couzbwh, aen yienh neix densidaiz roengzsim senj bouxboq- yaem Vahmauznanz, saeqsim guh sinhvwnz Vahmauznanz, cungjsuenq youq ngoenzyienhgingq cuengqok.

Baez neix cuengqok, cungfaen yienh’ok dangj caeuq guekgya doiq beksingq Mauznanzcuz gvansim, vih caenh’itbouh fatyiengz saujsu minzcuz conzdungj vwnzva, dajcaux deihfueng Mauznanzcuz vwnzva binjbaiz, haibanh aen densi lanzmoeg vahgangj minzcuz gig miz seizdaih daegsaek、 minzcuz daegsaek、 deihfueng daegsaek ndeu dwkroengz giekdaej gaenjmaenh. Engqgya fungfouq dangdieg saujsu minzcuz vunzlai vwnzva saedceij, ndaej daengz dangdieg vunzlai Mauznanzcuz haengjgyaez, vanzlij vih engq ndei baujhoh、 hwngfat caeuq swnjcienz vwnzva vahgangj Mauznanzcuz, veizhu minzcuz doxgiet cinbu saehnieb ndaej miz gig ndei coicaenh cozyung.

(Danz Su’myauz/谭素苗)