●Gaenh geij bi neix daeuj, Gunghcwngz Yauzcuz Swciyen nyinhcaen guh ndei nungzswh bouxguhseng’eiq caebcomz beizyin, daj goekgaen dawz- yiemz gvan cizlieng vafeiz、 nungzyoz. Doenggvaq yiemzgek guh ndei saekloeg lwgmak biucinjvaq swnghcanj, daj goekgyaeuj guh ndei guenjleix, mizyauq baujcang bouxsiuhfei “gwnzlinx ancienz”, ndaej daengz daengx guek gak dieg bouxguhseng’eiq haengjgyaez.

(Liengz Veih Dangz Fuzlonz)

●Geij ngoenz neix, Sanglinz Yen Cinhih Yauzcuz Yangh Donzveij youq Baizbah Mbanjyauz banh gaiq daih’it “11.11 doxduenq Cinhih·caez caux gyaeundei daengzcog” bouxcoz gyauyoux hozdung. 100 lai boux ndangdog bouxcoz saimbwk daj Sanglinz Yen caeuq seiqhenz yienhsi daeuj haenx camgya le hozdung.

(Lij Dauyungj)

●11 nyied 20 daengz 21 hauh, Lingzyinz Yen banh gaiq daih’it cungh siujyoz Sawgun dingqsij doxdax, daengx yienh gak yanghcin、 yienhsingz gak cungh siuj hagdangz cungj bauqmingz camgya doxdax.

(Siuh Fazlingz)

●Bineix daeuj, Dwzbauj Yen couzcomz cienz 10000.5 fanh maenz, haenqrengz doicaenh hong hwnjguh mbanjmbanj doeng lohsuijniz, daengz seizneix, daengx yienh 18 diuz 138.6 goengleix doeng mbanj lohsuijniz gaenq cienzbouh haihong hwnjguh. Aen yienh neix 185 aen hingzcwngcunh gaenq miz 175 aen ndaej doeng lohsuijniz, ngamq lw miz 10 diuz doeng mbanj lohsuijniz seizneix cingq gyagaenj guh hong, ceng’aeu youq bineix saedyienh mbanj- mbanj doeng lohsuijniz muz- byauh.

(Nungz Yungjfang)

●11 nyied 18 hauh banhaemh, Yungzsuij Myauzcuz Swciyen Anhdai Yangh banh saujsu minzcuz bouxguhnaz vwnzyi comzyienj. Miz 10 aen mbanj 12 aen Myauzcuz bouxguhnaz yenjyenz, biujyienj gofoux、 siujbinj、 vaiqbanj daengj cungj cezmuz feihdauh nyuenz miz neix, angqhoh fungsou. (Lungz Linzci)