Miz hwnz ndeu, Linzlinz cingq ninzndaek, sawqmwh deng sing doxceng cauz ndiu lo. Gij sing neix lumjbaenz daj ndaw suyoz gobwnj gwnz daiz cienz daeuj. Yienghneix Linzlinz mbaetheiq mbouj doengh, dingq gyoengqde gangj gijmaz.

Boux daih’it gangjvah dwg swngzhauh, de naeuz:“Bonjsaeh gou hung, gou ndaej dawz aen soq ndeu demgya baenz boix. Ndaej dawz geij aen soq doxdoengz doxgya haenx sikhaek suenq okdaeuj. Gyoengqvunz gig maij gou, gyoengqde youq mwh suenq ndaejcanh caeuq souhaeuj, cungj siengj daengz gou, gou gojyij bang gyoengqde demgya geij boix、geij cib boix, caemhcaiq engq lai leih’ik.” Swngzhauh lij caengz gangj sat, cawzhauh couh hai bak lo: “Neix miz maz citgeiz, gou yienznaeuz mbouj ndaej sawj aen soq he baenz boix demgya, hoeng gou ndaej sawj de sukiq gig lai. Danhfanz gij soq mwngz ndaej gyahung haenx, gou couh gojyij sukiq. Gyoengqvunz cawzle maij mwngz, nanzdauh couh mbouj maij gou ha? Gou ndaej sawj sonjsaet、uqlah caeuq cingzbonj gyoengqde doekdaemq, gemjnoix caihaih, gijneix mwngz guh ndaej lwi?”

Mwh swngzhauh caeuq cawzhauh cingq ceng dwk cauzhuhu, gyahauh caeuq gemjhauh hix ceng hwnjdaeuj lo. Gyahauh naeuz swhgeij gojyij sawj aen soq he onjdangq swnghwnj, gojyij suenq nienzgeij、suenq cingzcik, mbouj miz de, gyoengqvunz couh saetbae gig lai. Gemjhauh hix ceng naeuz gij youqgaenj swhgeij mbouj miz vunz beij, haujlai vunzlaux caeuq dahsau cungj maij de, vunzlaux maqmuengh hezyaz doekdaemq, dahsau mbouj maqmuengh swhgeij daiq biz, ndigah swhgeij ceiq ndaej gyoengqde maij.

Yaep ndeu, gyoengqde yied ceng yied haenq lo. Swngzhauh caeuq gyahauh guh mbiengj ndeu, gemjhauh caeuq cawzhauh guh doih ndeu, song mbiengj mwngz coenz gou coenz, cungj ceng mbouj dingz.

Linzlinz dingq daengz gizneix, caiq hix nyaenx mbouj youq lo. De hai aendaeng, doiq gya gemj swngz cawz naeuz:“Sou gaej caiq ceng lo, gou miz diuz daez ndeu sou bang gou suenqsuenq.” “Ndei ha, gou suenq gonq!” “Mbouj ndaej, gou gonq!” Gyoengqde youh ceng hwnjdaeuj lo. “Sou baenz boux baenz boux daeuj ba!” Linzlinz naeuz. “4□4□4□4□=4, sou ndwn daengz cungqgyang daeuj, yawj byawz ndaej sawj diuz daez neix doxdaengj.” Gyahauh boux daih’it hwnjbae, mboujlwnh de ndwn youq gizlawz, doeklaeng ndaej soq cungj dwg yied daeuj yied hung, cij ndei baih roengzdaeuj lo. Swngzhauh roxdaengz danghnaeuz swhgeij ndwn hwnjbae, doeklaeng ndaej soq itdingh yied daeuj yied hung, ndigah sikhaek biujsi swhgeij mbouj miz banhfap. Gemjhauh youh bae sawq baez ndeu, doeklaeng hix mbouj ndaej doxdaengj, cawzhauh hag swngzhauh yienghneix, hix biujsi swhgeij mbouj miz banhfap. Linzlinz yawj gyoengqde mbat ndeu naeuz:“Seizneix sou rox swhgeij giz mbouj gaeuq ndei haenx luba? Sou cijmiz doxgap, cijndaej dawz saehcingz guh ndei, mboujne couh cijndaej yied guh yied cuet!” Gya gemj swngz cawz seiq aen fuzhau neix, byawz hix mbouj gangj vah, laeglemx ndoj haeuj ndaw gobwnj bae lo.

(Couh Veicinh)