Miz boux lwgsai ndeu beizheiq gig ca, daxboh de gietdingh bang de gaij gij beizheiq ca de. Miz ngoenz ndeu, daxboh hawj de bau ding ndeu, iugouz de moix fat baez heiq ndeu, couh youq aengamx ranz de ding diuz ding he. Ngoenz daih’it, lwgsai youq gwnz gamx ding le 16 diuz ding.

Gvaq geij aen singgeiz le, de fatyienh, mbouj fatheiq beij ding diuzding hwnj aengamx bae lij yungzheih di. Menhmenh dwk, boux lwgsai neix hag rox nyaenx gij heiq de, moix ngoenz ding gij ding bienq noix lo. Caiq gvaqlaeng, lwgsai bienq ndaej mbouj gyaez fatheiq lo.

De aeu gij cienjbienq swhgeij lwnh hawj daxboh nyi. Daxboh naeuz:“Mwngz danghnaeuz ndaej genhciz daengx ngoenz ndeu cungj mbouj fatheiq, couh daj gwnz gamx ciemz ok diuz ding he.” Ginggvaq duenh seizgan he, lwgsai dawz gij ding de ding youq gwnz gamx haenx cungj ciemz okdaeuj liux lo.

Daxboh rag de daeujdaengz henz gamx, caenciet naeuz:“Lwg ha, mwngz guh ndaej gig ndei. Hoeng, mwngz yawj gij congh iq diuzding ding youq gwnz gaemx louz roengzdaeuj haenx, aengamx caiq hix mbouj dwg gij yiengh yienzlaiz lo. Dang mwngz doiq vunz fatheiq gvaq le, gij vah fatheiq seiz mwngz gangj haenx, couh lumj gij conghding neix, ndaej coeg sieng ndawsim bouxwnq. Neix couh lumj aeu cax coeg haeuj ndang vunz bae, couhcinj yut fagcax okdaeuj lo, baksieng hix ciengxlwenx louz youq gwnz ndang ha. (fouzmingz)