Ranz daxdaiq ciengx miz caet duz gaeqmeh, moix ngoenz ok miz roek caet aen gyaeq. Geij ngoenz neix, daxdaiq goengda nyaengq guh hong ndawreih, cungj lumz bae gip gyaeq lo. Miz ngoenz ndeu, gou siengj hwnj le bae gip aeu gyaeq seiz, raen ndaw rongzgaeq mbouj miz saek aen gyaeq. Gij neix dauqdaej dwg gijmaz cingzgvang ne? Haengjdingh dwg byawz caeg aeu gyaeq bae lo, gou caeuq goengda gietdingh aeu gaeb- dawz duzcaeg caeg gyaeq neix.

Gaengawq faensik, duz caeg neix aiq dwg gyanghaemh bae caeg aeu gyaeq. Yienghneix, goengda siengj ok aen banhfap ndeu——aeu fag napdiet daeuj nap. Goengda ra dietsienq、danzvangz、dietding caeuq gaiq benj he daeuj, yaep ndeu couh guh baenz aen napdiet gig gyaqciq ndeu. Dou dawz geij duz gaeqmeh vuenh bae cuengq dieg wnq, yienzhaeuh aeu fag napdiet cuengq roengz rongzgaeq bae, youq ndaw fagnap cuengq aen gyaeq ndeu guh ngaeuh.

Dou gwn haeuxcaeuz sat le, couh dingqnyi ndaw rongzgaeq cienz daeuj sing hemq gig camj, itdingh dwg duz caeg gyaeq haeuj hongx bae lo. Gou caeuq goengda ganjgip gaem dienhdoengz, buet bae coh rongzgaeq. Dou yienzbonj laihnaeuz duz caeg gyaeq dwg duznou, byawz rox dwg duz dou siengj cungj siengj mbouj daengz haenx, duzcaeg gingqyienz dwg duzcenh bak soem da iq haenx. Cij raen ganaj duzcenh deng fagnap nap dawz ndaetndetndet, lwed laebyod- byod, aenndang saenzdedded. Goeng- da gaemdawz fagcanj cingq yaek moeb duzcenh. “Gaej moeb, goengda!” Gou gipmuengz lanz goengda, “yienznaeuz de caeg gwn geij aen gyaeq, hoeng seizneix de deng sieng lo, hix suenq deng fad lo. Caiq gangj, duzcenh rox gaeb gwn duznou, suenq dwg baengzyoux ndei gomiuz bw, gvaqlaeng dou cuengq de bae ndaw reih ba.” Goengda dingq gou gangj le, doengzeiq lo.

Dou ra yw daeuj, bang duzcenh yw giz sieng, youh ra aen siengceij he hawj de youq. Caj duzcenh sieng ndei le, gou couh bae ndawreih cuengq “duzcaeg” neix.

(seiq nienzgaep Beiz Gingcouh)