Boux gyausou hag simleix ndeu bae ndaw hagdangz vunzvangh canhgvanh, liujgaij vunzvangh gwndaenj cingzgvang. Ngoenz ndeu roengzdaeuj, gamjdaengz bang vunzvangh neix guh saeh hawj vunz liuh mbouj daengz, suenq dwg da raen baez ndeu lo.

Siengj mbouj daengz yaek dauq danhvei seiz, fatyienh aen loekci deng vunz lid roengzdaeuj lo. “Itdingh dwg ndaek vunzvangh lawz daeuj luenh gauj lo.” Gyausou sim baenzneix siengj, doq doenghfwngz yaek cang aen loekbwhyungh hwnjbae.

Saehcingz mbouj ndei guh lo. Boux lid loekci gingqyienz lienz lozswh hix naeuj roengzdaeuj. Mbouj miz lozswh yawz an ndaej loekbwhyungh hwnjbae?

Gyausou mbouj miz saek di banhfap, mwh de gip ndaej mbouj rox baenzlawz guh seiz, boux vunzvangh ndeu lienz saet daiq diuq saet gvaqdaeuj lo, ndaw bak lij ciengq diuz go mbouj rox mingz ndeu. De raen gyausou yienghneix, couh dingz din roengzdaeuj cam dauqdaej fatseng gijmaz saeh.

Gyausou mbouj leixlangh de, danhseih doeklaeng lij dwg miz laexmauh dwk lwnh hawj bouxvunzvangh nyi.

Vunzvangh riuhaha naeuz:“Gou miz banhfap.” De daj moix aen loekci naeuj naed lozswh ndeu roengzdaeuj le, itheij dawz sam naed lozswh cang aen loekbwhyungh hwnjbae.

Gyausou doeksaet yat, ngeizvaeg dwk cam:“Mwngz yawz siengj ndaej ok aen banhfap neix daeuj?”

Vunzvangh riu naeuz:“Gou vunz baenzvangh, danhseih gou mbouj ngawz ne!”

Gizsaed, lajbiengz miz haujlai vunz, aenvih de fatyienh ndaw hong mizyinx, cungj biujyienh ok gij saeh caeuq vunzbiengz mbouj doengz ndeu okdaeuj, hawj vunz nanz lijgaij ndaej ok. Mbouj noix vunz youq mwh riusoemj vunzvangh seiz, gangj mbouj dingh vunz lij riusoemj de dwg vunzngawz dem bw.