Daegsanh ngoenzneix angq baenzmaz，neix dwg aenvih miz song boux baengzyoux daj gizgyae daeuj yawj de, lij naeuz haemh neix cingj de okbae guhdoih gwn caeuz ciengq go dem.

Daegvaz caeuq Daegfuz song boux baengzyoux ndei neix 10 lai bi mbouj lienzhaeh lo, danhseih dingqnyi naeuz songde lij seizseiz gvaqniemh de, cungj vunz neix caen nanz ra ha. Vihneix, Daegsanh ndawsim gikdoengh dangqmaz.

Miz vah naeuz:“Gyoengq baengzyoux laeujnoh fatcaiz couh mbouj doxra, miz nanh seiz cij daeuj doxcet.” Daegsanh mbouj doengzeiq coenz vah neix. Vihneix, mehyah ciengzseiz caeuq de euqgengz euqvang, naeuz:“Mwngz bae caeuq songde doxraen doxraen hix ndaej, mboujgvaq, ceiq ndei lai dawz di cienz he youq gwnzndang, mboujnex, goulau daengz seizhaenx mwngz deng laepda gwn nengznyaen—— mbouj ndwnj mbouj ndaej.”

Daegsanh naeuz: Baengzyoux cingjhek nanzdauh lij hawj gou ok ngaenz? Caen dwg mehmbwk byoem raez raen noix lo.

Daegsanh rieg buhvaq ndei, roiroi gyaeuj, ciuqciuq gingq, doq okdou bae ra baengzyoux lo.

Daegvaz caeuq Daegfuz caeux couh ndwn youq bakdou bouqlaeuj caj de, geij boux doxraen, doxgot doxhoh, haemhneix, cien coenz hauq fanh coenz vah daenz ndaw hoz yaek doxlwnh caez bae.

Haeuj congz naengh ndei le, sam ndaek baengzyoux noix mbouj ndaej cam neix cam haenx, doxcam 10 lai bi neix gak boux baenzlawz gvaq. Baez cam Daegsanh cij rox, song boux baengzyoux de dwg youq rog guh seng’eiq gaicawx hung, daehngaenz raek youq gwnz saivaq bongzbodbod. Seizneix gij saedceij songde gvaq ndaej ndei le, roxdaengz youxcingz beij ngaenzcienz naekna, ndigah dauq ranzcoj byaijbyaij yawjngonz baengzyoux geq, caemhcaiq cimhra miz gijmaz hanghmoeg baenz roengzbonj. Lij heuh Daegsanh bang songde dawz cawjeiq dem.

Cenj bae cenj dauq vuenh laeuj geij boi gwn geij amq byaek le, aenvih dungx byouq gwn laeuj mbouj miz maz demh dungx, Daegvaz caeuq Daegfuz naj nding rwz oq miz di daraiz lo, yawj daeuj songde miz di fiz bw, lij heuh naeuz yaek bae goding ciengq go guh’angq yaep ndeu dem, Daegsanh couh hemq fuzvuyenz daeuj gietsoq.

Daegvaz fwt ndwn hwnqdaeuj, gaenq dwg saemxsaemx saxsax, yiengq Daegsanh baetbaet fwngz naeuz: “Mwngz gaej guenj, gou ok ngaenz.” De ngamq gangj sat, Daegfuz youh ndwn hwnjdaeuj naeuz:“Sou gaej ceng, baezneix dwg gou cingjhek, yawz hawj sou ok ngaenz? Gou ok, gou ok.”

Daegfuz song fwngz ragdawz song fwngz Daegvaz mbouj hawj de mbon daeh, caih Daegvaz baenzlawz cukcak de cungj mbouj cuengq, songde got youq maenhdwt, boux mbouj nyiengh boux, sing gangj yied daeuj yied sang, lumjbaenz yaek doxceng doxmoeb nei, fuzvuyenz youq henz yawj dwk mwnhswd, mbouj rox baenzlawz guh, cij ndei cim coh Daegsanh.

“Dwg ha, songde boux rag boux, fwngz mbouj ndaejhoengq, dan lw fwngz gou ndaejhoengq lo. Hai, boux miz cienz, amqbak hung, vihliux donq haeuxcaeuz neix bae angjnaj, yienghneix roengzbae, goulau cingzngeih songde couh yaek goenq lo.” Daegsanh gag naemj gag ndeiriu, doq cacoemj mbon daeh gietsoq. Songde yawjraen le lij gyajcang guh mbouj raen, ciuqyiengh lij doxgot doxrag, Daegsanh bibi gyaeuj naeuz: “Soq gou giet sat, sou couh gaej ceng lo.”

Daegvaz caeuq Daegfuz caemdingh roengzdaeuj naeuz:“Mbouj caeux di gangj!” Songde lij siengj rag Daegsanh bae ciengq go, Daegsanh naeuz: “Gou gaenq yawj sou baenz seiq boux lo, ngoenzcog lij aeu bae hwnjban, mbouj miz seizgan buenx sou lo. ” Gangj sat doq laeglemx gag ndot bae ranz lo.

Daegsanh ma daengz ranz seiz, mehyah ninz ngamq ndiu gvaqdaeuj, cam naeuz: “Byawz cingjhek?”

Daegsanh dap naeuz:“Baengzyoux cingj.”

“Yienghneix dawz cienz dauq hawj gou.”Mehyah naeuz.

Daegsanh youh naeuz:“Baengzyoux cingjhek gou ok ngaenz.” Mehyah riunyaen mbwnj bak naeuz: “Gou gangj mbouj loek ba? Haxbaenh Daeggangh dwk dienhvah daeuj naeuz , de gaenq ngaiz catsaij gvaq lo.”

Daegsanh dingq le bak aj linx iet, naeuz:“Okrog nanz，raen lai gvai lai, caen rox yienjheiq, gou vunzsoh bak noix, raen noix bamz lai, baezlaeng roxhit lo.”