Gaenh geij bi neix daeuj, Bingzgoj Yen yungh lai cungj banhfap, haenqrengz baujhoh caeuq swnjcienz fwenliuz vwnzva Bouxcuengh.

Bae ndawbiengz, vatcimh cingj- leix yenzswnghdai fwenliuz. Gaengawq gojgaeq canghfwen cienzciengq, soucomz ndawbiengz conzdungj bonj- cau ma fanhoiz、 cingjleix caeuq biensaw, ok dauq saw 《Bingzgoj Fwenliuz Bouxcuengh》.

Daj iq guh hwnj, hawj fwenliuz miz boux swnjcienz. Youq hagdangz hai fwenliuz banmizyinx, hawj lwgnyez gyaez ciengqgo haenx hag eu fwenliuz, laebbaenz Yinzdojleizniz Lwgnyez Bouxcuengh Habciengqdonz, swnj- cienz caeuq fatyiengz fwenliuz vwnzva bouxcuengh.

Dajcauh duivuj, yungh lai cungj hingzsik cienzciengq fwenliuz moq. Cujciz 38 aen ndawbiengz fwenliuz gyoebhab duivuj seizneix miz haenx, ciengzseiz baizlienh yienjok, leih- yungh vwnzva roengz mbanj、 soengq heiq roengz mbanj、 cwngcwz senhconz daengj hingzsik vunzlai haengj dingq gyaez yawj haenx cienzciengq fwenliuz.

Hai lundanz, haeujlaeg yenzgiu fwenliuz vwnzva. Iucingj ndaw guek rog guek lauxhangz mizmingz caeuq lauxhangz canghciengqgo daiqbiuj youq aen yienh neix haidanz, doengz- caez damqlwnh baujhoh、 swnjcienz caeuq hwngfat fwenliuz、 hawfwen Bouxcuengh.

Gyagiengz senhconz, hawj seiq- gyaiq roxnaj fwenliuz Bouxcuengh. Doenggvaq banh hawfwen ciet ciengqgo senhconz doigvangq fwenliuz Bouxcuengh, hawj yied daeuj yied lai vunz roxnaj fwenliuz Bouxcuengh. Gaenq banh baenz daengx gih “fwenliuz Bingzgoj——fwenvuengz Guengjsae iucingj doxdax”、 daengx yienh fwenvuengz fwenliuz senjok doxdax、 “singyaem ndei Mbanj- cuengh” hawfwen ciet ciengqgo、 moix bi “sam nyied sam” ciet hawfwen daengj.

(Vuz Anhginh/吴安军）