1.Aeu gyaeujsuenq daem yungz baenz giengh dwk roengz bingzbyouq bae, bakbingz doiqcinj conghndaeng, caenhliengh mupnyouq feihget gyaeujsuenq, yawj binghcingz moix ngoenz mupnyouq 4 daengz 5 baez, feihget damh le lingh vuenh suenqnaez haeujbae, aenbingz gaej hung lai, bakbingz sup ndaej haeuj conghndaeng couh ngamj.

2.Moix haemh yaek haeujninz gaxgonq, swiq din seuq le, cab gyaeujsuenq baenz gaiq mbang nem giz yungjcenz angjdin (liz giujdin coh angjdin daih’iek 1/3), doeklaeng aeu gyauhbu nem maenh. Aenvih gyaeuj- suenq rox gig naengnoh, ceiq ndei haetlaeng hwnqmbonq doq sik bae. Cungj fuengfap neix doiq baenzae、ndaeng ok lwed caeuq haexgax miz itdingh ywyauq, laebdaeb nem 7 daengz 10 ngoenz, yaugoj engq ndei. Gojnengz miz mbangj vunz nem angjdin le rox hwnjbop, ceiq ndei caj bop dek le naengnoh hobndei caiq nem, yienghneix haemq ndei di.

3.Lwgnyez ae’ngab seiz aeu 2 daengz 3 dip gyaeujsuenq, vunzhung ae’ngab seiz aeu 7 daengz 8 dip bek soiq dwk roengz vanj bae goeb fa ndei caiq dwk roengz rek bae naengj, sien yungh feizhaenq coemh goenj caiq gaij yungh feiznumq naengj 15 faen cung, ae youqgaenj seiz ngoenz gwn 3 baez, gojyij mbouj gwn gyaeujsuenq dan gwn raemx de. Ngoenz daihngeih caiq naengj seiz aeu gya di dangznae ndeu, lwgnyez dwk naed ndeu, vunzhung dwk 2 naed. Ndawbiengz ciengz yungh aen dan neix daeuj yw baenzae、hozgyawh fatyiemz、ae’ngab caeuq feigezhwz.

4.Gyaeujsuenq gya dangznae baek raemx gwn, lwgnyez dwgliengz baenzae, gwn le yaugoj beij gwn yw dajcim yaugoj engq ndei. Fuengfap dwg: Aeu 30 gwz gyaeujsuenq, 10 gwz dangznae gya 200 hauzswngh raemx, sien hai feizhaenq coemh goenj, caiq gaij yungh feiznumq baek geij faen cung, doeklaeng ngauz baenz raemx lw vanj iq ndeu hawj lwgnyez gwn. Lwgnyez ae youqgaenj seiz, gyanghaet、banngaiz、banhaemh gak gwn baez ndeu, ngoenz daihngeih couh raen miz yaugoj, gwn 3 ngoenz couh ndeidingh.

5.Danghnaeuz ae’ngab youq- gaenj, caemhcaiq miz myaizsaw haurik, gangjmingz dwgliengz haemq naek, gwn gij yw gwnzneix doengzseiz, caiq gya hingndip、gyaeujsuenq、dangznding itheij baek raemx gwn. Lwgnyez ndaej aeu 3 gep hingndip、3 dip gyaeujsuenq、byongh sieg dangznding, vunzhung ndaej aeu 7 daengz 8 gep hingndip、7 daengz 8 dip gyaeujsuenq, sieg dangznding ndeu dwk rek gya raemx, hai feiz coemh 10 faen cung le gwn, baenz naek seiz ngoenz gwn 3 baez.

6.Aeu 3 daengz 4 aen gyaeuj- suenq bok naeng ndei le cab baenz gaiq mbang, gyanghaemh yaek ninz seiz cab baenz gaiq mbang baij- cuengq youq henzbien saeuqfeiz ring, haet daihngeih ca mbouj lai deng ring sauj lo, danhseih haeujsim gaej ring remj. Doeklaeng daem mienz. Aeu beuzgeng mwnh suenq ndeu dwk roengz boi bae, caiq dwk di dangznding he, ndingq di raemxgoenj ndeu ngauz yinz gwn, ngoenz gwn boi daengz song boi, lienz gwn 3 ngoenz, ae doq ndeidingh.