Seizcou daengz lo, dahsau seiz- cou yaengyaeng byaij daeuj lo.

De byaij haeuj ndaw ndoengfaex, soengq geu buhlongz henj he hawj daxgoeng goyangz. Daxgoeng goyangz daenj hwnj geu buhlongz henj neix, sikhaek bienqndaej daegbied cingsaenz. De riuhoho doiq dahsau seizcou naeuz:“Dahsau cou, docih mwngz!”

Go’nywj youq goekfaex goyangz haenx yawjraen le, de doiq dahsau seizcou naeuz. “Dahcej cou, mwngz soengq geu buhlongh henj he hawj gou ndaej lwi?”

Dahsau seizcou riu dwk naeuz: “Ndei ha! Ndei ha!”

Yienghneix, dahsau seizcou hix soengq geu buhlongz henj he hawj go- nywj.

Lwgnyez rumzcou diuqbeiz haenx gaenjgaenj riengz youq baihlaeng dahsau seizcou, angq dwk buetlili. De yawjraen daxgoeng goyangz caeuq dahnuengx go’nywj cungj longz hwnj buhlongz henj, angq dwk hemq hwnjdaeuj:“Ya! Gyaeundei raixcaix!”

De humx daxgoeng goyangz cienq bae cienq dauq, baenzlawz cungj yawj mbouj gaeuq.

Lwgnyez rumzcou daeujdaengz baihnaj daxgoeng goyangz, byaengq aenda iq de, bungj daxgoeng goyangz naeuz:“Daxgoeng goyangz, ciq buh- longz henj mwngz hawj gou daenj mbat he ba!”

Daxgoeng goyangz riuhwhw yawj dwk lwgnyez rumzcou, mbouj han de.

Lwgnyez rumzcou gip lo, de bongq aenbak yungh rengz boq rumz, gig vaiq couh aeu geu buhlongz henj daxgoeng goyangz ciengj gvaqdaeuj lo. De angqvauvau itmienh sawq daenj buhlongz henj, itmienh diuq foux de gag bien haenx.

Hoeng, buhlongz henj daiq hung lo, lwgnyez rumzcou saetmuengh dwk naeuz: “Geu buhlongz henj baenzneix ndeiyawj, hojsik gou daenj daiq hung lo……” Lwgnyez rumzcou itmienh nambyodbyod, itmienh doiq daxgoeng goyangz naeuz: “Boiz hawj mwngz!” Gangj dwk, geu buhlongz henj couh vut youq gwnzdieg. Lwgnyez rumzcou cix siuqrumz buet deuz lo.

Dahnuengx go’nywj yawj mbouj gvaq da, nai daxgoeng goyangz naeuz:“Daxgoeng goyangz, mwngz gaej hozndat bw, lwgnyez rumzcou cij dwg miz di diuqbeiz……”

Daxgoeng goyangz doiq go’nywj naeuz:“Mbouj youqgaenj law, couhcinj lwgnyez rumzcou mbouj duet geu buhlongz henj bae, gvaq duenh seizgan he, gou hix dawz geu buhlongz henj duet bae.”

“Vih gijmaz ne?” Go’nywj ngeizvaeg dwk cam.

Daxgoeng goyangz naeuz: “Danghnaeuz mbouj duet geu buhlongz bae, seizdoeng daengz le, raemx gwnz ndang dou couh saet bae haujlai, doiq ndangdaej mbouj ndei ha!”

Go’nywj dingq gij vah daxgoeng goyangz le, riu naeuz: “Laxlawz dwg yienghneix ha, baenzneix gou couh cuengqsim lo.”

Daxgoeng goyangz riu lo, go’nywj hix riu lo. Youq ndawdoengh, gij sing riu gyoengqde cienz ndaej gig gyae gig gyae.

(Liuz Genvaz)