Mwh iq gou caeuq daxdaiq fwngz gaem fwngz doxcaez byaij, gou roxnyinh daxdaiq dwg baenzhaenx sang. Seizneix, daxdaiq laenggoz lo, gou caeuq daxdaiq ityiengh sang lo.

Mwh iq gou caeuq daxdaiq fwngz gaem fwngz doxcaez byaij, fajfwngz daxdaiq ndaej aeu gaiqfwngz gou cienzbouh bau dawz, fwngz hung gaem fwngz iq, gaiqfwngz daxdaiq geijlai unqnem ha. Seizneix, fajfwngz gou caeuq fajfwngz daxdaiq ityiengh hung lo, gaiqfwngz daxdaiq hix bienq ndaej lumj gaiq faexroz ityiengh. Lwgfwngzcod daxdaiq seizneix gaenq doengh mbouj ndaej lo. Mehfwngz caeuq lwgfwngzcaemj hix vangoz bienqyiengh, moix baez gaem gaiqfwngz daxdaiq, gou cungj roxnyinh genggaeng cocat.

Gou bae hagdangz le, daxdaiq buenx gou hwnjhag、cuengqhag. Geiq ndaej miz baez coumued he, daxdaiq buenx gou bae hwnj goqmeijsuz, roengzdangz le, gou lumj bingzseiz ityiengh lumj duzmax buet nei buet bae coh gunghgung heiqci, gizsaed gou yienghneix guh couhdwg siengj ciengj song aen diegnaengh. Boux daxheiz he umj lwgnyez hwnj ci le, gij vunz naengh gwn diegnaengh haenx lumj yawj mbouj raen nei mbouj yawj saek mbat, daxdaiq yawjraen le, sikhaek aeu aen diegnaengh gou mbouj yungzheih ciengj daengz haenx nyiengh hawj daxheiz naengh. Gou fatheiq dwk doiq daxdaiq naeuz:“Mwngz dwg vunzlaux lij nyiengh diegnaengh ha?” Hoeng daxdaiq cix riu dwk doiq gou naeuz:“Mwh naengz bang couh bang mbat he.” Gou caeuq daxdaiq naengh gungh- gung heiqci ciengzseiz fatseng gij saeh nyiengh diegnaengh, seizgan nanz le, gou hix cawjdoengh nyiengh diegnaengh lo.

Daxdaiq lij dwg boux “cienmonz” cawj haeuxbyaek hawj gou ne, gou moix ngoenz cungj ndaej gwn daengz gak cungj byaek ndeigwn. Miz duenh seizgan he goengda baenzbingh, daxdaiq bae ciuqgoq goengda, mbouj miz seizgan cawj gij ndeigwn hawj gou gwn, gou moix ngoenz gwn gij haeuxbyaek daxmeh cawj hawj gou haenx, gou cungj roxnyinh daengz mbouj lumj daxdaiq cawj ndaej ndei gwn. Gou gwn ndaej gig noix, daxmeh aenvih yienghneix fatheiq ne.

Neix couhdwg daxdaiq gou, boux vunz buenx gou majhung he.

(haj nienzgaep Sij Yinzgingh)