●10 nyied 15 hauh, Sanh- gyangh Dungcuz Swciyen Gaugaep Cunghyoz gawjbanh minzcuz conz- dungj dijyuz yindungvei, daengx hagdangz lauxsae hagseng itheij guh gij cezmuz diuq fouxsaux、 diuqcag、 bau aen domq daengj gig miz minzcuz daegsaek haenx, cauhmoq swnjcienz vwnzva minzcuz.

(Gungh Bujgangh)

●Bineix daeuj, Fuconh Yauz- cuz Swciyen youq Fuli Cin Sinz- senhhuz seiqhenz mbanj cwngdieg daeuj ndaem va 600 moux, faenbied ndaem miz vagwzsangh、 vabak- ngoenz、godaengngoenz daengj haujlai cungj va, seizneix 550 moux suenva hai va le, ngoenznaengz yinx ndaej haujlai rog yienh ndaw yienh hekyouz daeuj yawjngonz youzcet.

(Cinz Yengiz Liu Cwngz- lieng)

●Gaenh geij bi neix daeuj, Duh’anh gaengawq bonjdieg swh- yenz、 gyaudoeng、 dieg ndei caeuq seizneix canjnieb giekdaej, guh hung cungjliengh, guh ndei cizlieng, haenqrengz doicaenh “gunghyez giengz yienh” gensez, laeb Duh’anh suen gunghyez, gonqlaeng yinx daeuj 16 aen giyez haeuj suen, baenz aen deihfueng daegsaek gunghyez dijhi he, hawj aen yienh neix bienq akgiengz demgya souhaeuj.

(Hanz Ginhcinz)

●10 nyied 7 hauh, Gungh- cwngz Yauzcuz Swciyen Lajmbanj Sanghyez Ngaenzhangz vwnzyidui bae Gvanhyinh Yangh Swhdangz Siuhsanh Cunh gawjbanh vwnzyi lenzyiz yienjok hozdung. Daengx ciengz miz siujbinj、 diuqfoux、 caijdiu daengj 15 aen cezmuz vunzlai haengj dingq gyaez yawj haenx, doengzseiz youq seiz biujyienj seizgeiz lij miz ginhyungz cihsiz caeuq faplwd cihsiz miz ciengj ciengjdap dem. Cungj hozdung neix hawj vunzlai seizhoengq vwnzva saedceij bienq fungfouq.

(Cwng Ciminj Maj Sufaz Cuz Canghyi)

●Gaenh geij bi neix daeuj, Lungzswng Gak Cuz Swciyen haenqrengz hwngfat canjnieb saek- loeg. Dangqnaj, aen yienh neix dajndaem gocaz 17000 lai moux, mbawcaz canjlieng 3000 lai dun, canjciz 2.4 ik maenz, ndaem caz gaenq baenz cungj fapbauj hawj vunz dangdieg baenzfouq.

(Veiz Gizyangz)