Haeujninz dwg boux vunz raeuz hoizfuk rengzndang、baujcwng gengangh、demgiengz aenndang menjyizliz aen soujduenh youqgaenj ndeu. Seizcou mbwn liengzsangj, vunzraeuz haeujninz lai ndei di lo, hoeng danghnaeuz mbouj haeujsim, haeujninz cizlieng hix rox deng yingjyangj bo. Ndigah, seizcou mwh haeujninz seiz wnggai haeujsim baihlaj geij aen fuengmienh:

It geih yaek haeujninz gwn doxgaiq. Yaek haeujninz seiz gwn doxgaiq rox gyanaek dungxsaej fudanh, yungzheih cauhbaenz siuvaq mbouj ndei, doiq aenndang miz haih, caemhcaiq rox yingjyangj daengz haeujninz dem. Dungx saed- caih iek lai, ndaej gwn di doxgaiq ndeu, caiq yietnaiq yaep ndeu cij haeujninz.

Ngeih geih gwn caz. Gah- feihgenj ndaw caz ndaej gig cunghsuh sinzgingh hidungj yinxhwnj fatangq, yaek haeujninz gwn cazgwd bouxvunz nanz ninz ndaej ndaek, gwn caz daiq lai gyanghwnz nyouh hix lai, yingjyangj haeujninz.

Sam geih yaek haeujninz cingzsi gikdoengh. Yaek haeujninz seiz cingzganj fub hwnj fub roengz rox yinxhwnj heiqlwed luenhyab ninz mbouj ndaek, lij rox sienghaih daengz ndangdaej dem. Ndigah, yaek haeuj- ninz gaxgonq gaej daiq youcaeuz roxnaeuz cingzsi gikdoengh lai, daeg- bied dwg gaej luenh fatheiq.

Seiq geih yaek haeujninz guh- angq gvaqbouh. Yaek haeujninz gaxgonq danghnaeuz guh’angq gvaq- bouh, daegbied dwg guh hozdung gig gaenjcieng daiq nanz, rox hawj sinzgingh bouxvunz laebdaeb fatangq, nanz ninz ndaej ndaek.

Haj geih haeujninz seiz gangjvah daiq lai. Mwh ninz seiz gangjvah daiq lai rox sieng heiqbwt, hix rox hawj cingsaenz bouxvunz fatangq, yingjyangj haeujninz.

Roek geih goemq naj ninz. Rag denz goemq naj ninz rox hawj vunz diemheiq sinhoj, aenndang siuj heiq- yangj, doiq ndangdaej gengangh fouz leih.

Caet geih mwh ninz aj bak. Haep bak haeujninz ndaej baujciz yienzheiq. Danghnaeuz aj bak diem- heiq, sup haeuj rumznit caeuq faenx rox sienghaih aenbwt, aendungx hix yungzheih dwgliengz.

Bet geih haeujninz seiz deng rumz ci. Ndang vunz mwh haeujninz seiz haemq nanz sikhab vanzging bienqvaq, yungzheih deng rumznit ciemqhaeuj. Ndigah mwh haeujninz seiz aeu haeujsim bauj raeuj, gaej hawj rumznit cigciep ci daengz aenndang.