Ciuqei geiqciet bae gwn cuk, seizcin gwn cukvagut, ndaej ciengx daep gej doeg; seizhah gwn cukduhheu, ndaej siu ndat siu hwngq; seizcou gwn cukraetngaenz, ndaej nyinh yaem nyinh sauj; seizdoeng gwn cukbetbauj, ndaej raeuj dungx cangq mamx.

Ciuqei ciengx ndang cangq ndang bae gwn cuk, boux ninz mbouj ndaek ndaej gwn cuk cehmbu beghab, ndaej an saenz bouj sim; boux hwet in hwet naet gwn cuk gaeujgij maknengznuengx, ndaej bouj mak giengz ndok; mehsenglwg gwn cuk haeuxfiengj dangznding, ndaej ciengx lwed cangq mamx; boux baenz foegraemx gwn cuk mbawngaeux duhnding, ndaej siu ndat leih caep; boux haexsiq gwn cuk haeuxcid daihcauj, ndaej cangq mamx ik heiq; boux ok nyouh mbouj swnh gwn cuk haeuxyangz haeuxlidlu, ndaej leih raemx nyinh caep; boux baenz haexgaz gwn cuk maenzcienz lwgmaenz, ndaej ik heiq doeng haex.

Yungh va’ndip guh yenzliuh cawj cuk, feihdauh sien ndei sangj bak, gwn cuk haeuxsuen vabeghab, ndaej cing sim an saenz、dingz ae nyinh bwt; gwn cuk haeuxsuen vagveiq, ndaej daez saenz singj mamx、vaq cwk sanq cwk; gwn cuk haeuxsuen vagimngaenz, ndaej yw rumzndat dwgliengz、conghhoz ndingfoeg. Aeu va cawj cuk, sien dwk haeux cawj cuk cug caiq dwk va roengz, va ngamq cug couh baenz gwn.