Vuenyungz youq gizlawz? Daeg- nuengx naeuz, vuenyungz youq ndaw naeddangz diemzsubsub haenx. Dax- meh naeuz, vuenyungz youq ndaw ngaizhaet daxboh guh haenx. Daxbuz naeuz, vuenyungz youq ndaw foux gou diuq hawj de yawj haenx.

O, gou rox lo, vuenyungz gizsaed gizgiz cungj miz, raeuz aeu yungh sim bae gaeb’aeu.

Mwngz dwg mbouj dwg sawq iet ok gaiqfwngz, bae gaeb’aeu duz- mbungqmbaj mbinfifi haenx? Dang doiq fwed caijsaek gyaeundei dingz youq byai mbawnywj, mwngz byaengq aenda cim dwk de, mbouj rox mbouj nyinh iet ok song fwngz, laeglemx coemj coh baihnaj, sikhaek gob lwgfwngz hwnj, angjfwngz roxnyinh bungq deng de lo. Hoeng, mwngz siujsim aj fajfwngz le, mbungqmbaj youh mbin deuz lo, cij louz roengz mbawnywj miz di bidoengh haenx. Seizhaenx, vuenyungz gaenq deng raeuz ndaetndi gaebdawz lo.

Bienj bonj cozvwnz swhgeij mwh it nienzgaep sij haenx, gou cimz daengz gij soemj、diemz、haemz、manh ndaw gwndaenj genjdanh haenx; ra daengz bonj cozvwnz swhgeij mwh ngeih nienzgaep sij haenx, gou vih gij sijcoz suijbingz swhgeij ndaej daezsang gamjdaengz sim’angq; doeg- doeg gij cozvwnz swhgeij mwh sam、seiq、haj nienzgaep sij haenx, miz seiz gou couh nyaenx mbouj youq riuhaha hwnjdaeuj, laxlawz ndaw hagdangz dou fatseng gvaq baenzlai goj mizyinx ha.

Ninz youq gwnz mbonq cwxcaih gou, gou nyienh’eiq baez youh baez dauqngeix gij saeh gou caeuq baengzyoux ndei youq doxcaez haenx. Mwh haj nienzgaep, gou caeuq Dwngz Yijyangz、Yauz Yijdungz、Vangz Hanzyi、Lij Cinglinz youq ndaw hagdangz doxcaez mieng gvaq: Baengzyoux ndei miz fuk caemh yiengjsouh、miz nanh caemh rapdawz! Mwh gou deng vunz hangz, Yauz Yijdungz cungj oknaj daeuj bang gou…… gou siengj dwk siengj dwk, raemxda vuenyungz couh lae mbouj dingz.

Gij roxnyinh vuenyungz geijlai gyaeundei ha, gij feihdauh vuenyungz gig daegbied bw. Yamqdin vuenyungz aeu yunghsim bae byaij, duzngaeuz vuenyungz aeu yunghsim bae gaeb- aeu!

(roek nienzgaep Yangz Linz)