Gou youq gwnz loh ma ranz ngaizngaiz ngednged byaij dwk, caiq hix mbouj lumj doenghbaez cuengqhag le buetbuet diuqdiuq lo, gijneix cungj ienq mbaw sigenj ndaw fwngz gou. 58 faen cingzcik daegbied coegda, lumj fagmid nei coeg haeuj aen’aek gou.

Ai, caen siengj sik soiq mbaw sigenj dwgcaengz neix bae, mbouj hawj daxboh daxmeh yawjraen. Mbouj ndaej bw, lauxsae heuh aeu hawj gyahcangj ciemcih bw. Aeu faensoq gaij bae, hix mbouj ndaej, daxboh daraeh haengjdingh yawj ndaej ok. Neix mbouj ndaej haenx mbouj ndaej, guenyaem duzyou simsienh simndei vaiq gouqgouq gou ba! Mboujnex caekhaex gou itdingh deng daxboh moeb gawh bae lo! Gou gvaqlaeng itdingh roengzrengz doegsaw, nyinh- caen guh cozyez, guh boux hagseng ndei ndeu! Hoeng guenyaem duzyou youq gizlawz ya, ngaeuz cungj mbouj raen ne.

“Yo, lwg neix ngoenzneix baenz- lawz unqnemnem lone? Dwg bingh la?” Daxmeh lumh aen’gyaeuj gou, “mbouj miz saeh ha. Bae gwn haeux ba.”

Seizneix, daxboh cingq yawj densi haenx baenq gyaeuj gvaqdaeuj naeuz: “Mwngz baez fanjciengz couh miz saeh. Naeuz, youh nyex maz hux lo? Mbouj nyexhux mwngz lwg neix couh mbouj an’onj.”

Ai, dwg fuk mbouj dwg hux, dwg hux ndoj mbouj gvaq. Gou baez haeb heuj, laemxsim naeuz: “Gou baezneix gaujsi mbouj gizgwz! Gvaqlaeng gou itdingh ndeindei hagsib, ceng’aeu aeu ndaej cingzcik ndei!”

Yo, siengj mbouj daengz daxboh mbouj moeb gou, dauqfanj riu lo: “Mwngz lwg neix ngoenzneix gig ak bw, lij rox nyinh loek gonq. Ndei, couh yawj gij daidu mwngz neix, gou mbouj moeb mwngz. Mwngz aeu geiq ndaej gij vah mwngz gangj haenx. Bae gwn haeux ba.”

Aensim gaenjged gou soeng roengzdaeuj lo, cungj suenq mbouj deng moeb lo. Ai, gvaqlaeng caen roengzrengz doegsaw cij ndaej lo, lwgsai gangj ok gij vah haenx couh lumj diuzding ding hwnj gaiqbenj bae, gou itdingh hawj daxboh yawjraen gou gangj vah suenqsoq, aeu cingzcik daezsang hwnjbae.

(roek nienzgaep Niuz Cang)