Vihliux baujhoh swnjcienz daeg- saek vwnzva bonjdieg, gaenh geij bi neix daeuj, Dwzbauj Yen doenggvaq soucomz cingjleix oksaw、 hailaeb Vahcuengh densi lanzmoeg、 doicaenh minzcuz vwnzva haeuj hagdangz caeuq baujhoh coihcingj conzdungj ranzgaeuq daengj fuengsik, netsaed doicaenh hong baujhoh swnjcienz vwnzva minzcuz, aeu ndaej cingzcik gig ndei.

It dwg cujciz bonjyienh vwnzva boux mizmingz、yisuzgyah daengj ligliengh, soucomz cingjleix oksaw le 《Ngeihyienz Ndokmax Bouxcuengh Giekdaej Gyaucwngz》、《Byayinzsanh Dahgensuij》、《Fwenyoux Dahgensuij》 daengj buek saw vwnzyi miz daegsaek minzcuz naekna he, vih baujhoh swnjcienz ndei minzcuz vwnzva dwk roengz giekdaej; ngeih dwg hailaeb 《Sinhvwnz Vahcuengh Dwzbauj》、 《Gojgaeq Byayinzsanh》 daengj Vahcuengh densi lanzmoeg, hawj ndawbiengz cungj daeuj gvansim hong baujhoh swnjcienz vwnzva minzcuz; sam dwg netsaed doicaenh hong vwnzva minzcuz haeuj hagdangz, aeu yisuz ngeihyienz ndokmax Bouxcuengh、Gienzcuengh Dwzbauj daengj daegsaek vwnzva bonjdieg yinxhaeuj hagdangz, leihyungh hag- dangz aen gyauyuz bingzdaiz neix, senhconz、 fatyiengz daegsaek minzcuz vwnzva maenhndei bonjdieg; seiq dwg haenqrengz doicaenh hong baujhoh Bouxcuengh conzdungj ranzgaeuq, cingjhab gij cienzngaenz bumwnz coih ndei ranzcanx Bouxcuengh Cuzyungz Cin Nazlieng Cunh Mbanjnazleiz, mbanj daegsaek saujsu minzcuz baujhoh ndaej gig ndei. Bi’gvaq gouj nyied, aen yienh neix Cwngzgvanh Cin Mbanjdaso ndaej daengz Guekgya Minzveij ancoh baenz “mbanjranz daegsaek saujsu minzcuz Cungguek”, bienq- baenz daengx guek 340 aen mbanjranz ndaej aen cwngheuh neix ndawde aen he.

(Nungz Yungjfang/农永放)