Haethaet gwn raemxgyu, haemhhaemh gwn dangzrwi. Haeuj daengz seizcou, aeu dawz baujyangj heiqyaem ndaw ndang dangguh aen yinvu daih’it. Gijgwn ciengx yaem miz gig lai, lumj bya’nouq、lwgraz、makhwzdauz、haeuxcid、cijvaiz、duhdoem、maenzcienz ndip、makbwzgoj、makleiz、makcauj nding daengj, ndawde ceiq miz daibyaujsing dwg dangzrwi. Cunghyih nyinhnaeuz, dangzrwi ndaej ciengx yaem nyinh sauj、nyinh bwt bouj haw、nyinh saej doeng haex、gej yw dengdoeg、ciengx heiq mamx、meijyungz saeknoh. De dwg cungj gijgwn bouj naengzliengh ndei ndeu, doiq vanjgaij naetnaiq yaugoj gig ndei.

Dangzrwi ndaej cigciep heuz raemxraeuj gwn, hix ndaej heuz raemxmak gwn. Vet ngveih makleizsezliz ok, ndingq dangzrwi haeujbae maedfung naengj cug gwn, ndaej bouj yaem bwt mbouj gaeuq. Guh liengzban makyungz seiz rwed di dangzrwi ndeu roengzbae, feihdauh hix haemq ndei; hix ndaej dawz de caeuq lwgmak wnq gyaux gwn, feihdauh mbouj loek.