Roegga daj baez deng nyaenma yaeuh aeu gaiqnoh ndaw bak bae le, itcig gig ienqhoij. De gingciengz gangj gienh saeh de hwnjdangq haenx hawj vunz ndaw ranz caeuq baengzyoux dingq, daengq daihgya gaej saenq vah’unq vahvan nyaenma, maqmuengh daihgya geiq ndaej aen hit neix. Gyoengq roegga lwg cungj naeuz, baezlaeng caiq hix mbouj dingq vahgyaj vahvad gyaenma lo.

Ngoenz haenx, duz roegga iq he ndaw bak gamz gaiq noh he, cingq youq gwnz go faex hung yietbaeg. Dingjlingz, duz nyaenma he okdaeuj ra gwn, yawjraen gaiqnoh ndaw bak roegga iq lo, couh hainduj gangj vah’unq vavan. Roegga iq siengj daengz gij hit roegga dangnienz haenx, baenzlawz cungj mbouj haengj hai bak gangj vah. Nyaenma ganvad haenx raen roegga iq mbouj haengj hai bak, cehda baenq mbak he, youh naemj ok aen geiq he daeuj. De sawqmwh ndaq roegga iq:“Duzroegga dwgcaengz, gij sing sou baenzhaenx yaek dingq, youh maj ndaej lumj danqfeiz nei ndaemndat, nanzgvaiq gyoengqvunz cungj naeuz sou dwg duz mbouj gitleih, bungz daengz sou couh boihseiz……”

Dingq nyaenma gangj gij vah heifouh gyoengqde haenx, roegga iq huj dwk caiq hix nyaenx mbouj youq lo, couh yaek boiz ndaq gyaenma. Hoeng de ngamq hai bak, gaiqnoh couh doek roengzdaeuj lo. Nyaenma vaiqvet gamz hwnj gaiqnoh, yaepyet deuz bae ngaeuz cungj mbouj raen lo. (sam nienzgaep Lij Lili)