“Seizcou vunz heih maj biz”, saedcaih dwg yienghneix. Seizciet cawzhah raezrang hawj ndang vunz baiz ok caeuq siuhauq naengzliengh beij seizcou lai, caiq gyahwnj ok hanh haemq lai, gvangvuzciz daengj yingzyangj doxgaiq hix gaenriengz sied bae lai; ok hanh lai le raemxsiuvaq ndang vunz iemqok noix, mbouj ngah gwn doxgaiq, sup haeuj yingzyangj couh noix lo. Cunghab gij yenzyinh neix, seizhah siengj biz cix nanz lo. Riengzdwk seizcou daeuj daengz, mbwn liengzsangj haujlai, vunz lai gwn ndaej doxgaiq, siuvaq caeuq supsou naengzlig cugciemh hoizdauq ndei, gij gwnndoet fuengsik seizhah gaenq mbouj muenxcuk amqbak caeuq aenndang vunzraeuz lo, mbangj huqbiz huqnywnx youh dauq dawz hwnj gwnz daizbyaek daeuj, mbouj biz cix gvaiq lo.

Ndigah, seizcou aeu guh daengz gwnndoet doxdaengh caemhcaiq caezcienz、gwn noh gwn cai hableix dapboiq、lai gwn byaekheu caeuq lwgmak. Vih ndangnaek baujciz cingqciengz, wng noix gwn huqdiemz、manhget、youznywnx caeuq youzcaq, lai gwn di lwghaemz、lwgbieng、makdumh、makgai、makmizhouz- dauz daengj byaek mak, mizleih nyinh saej doeng haex. Naengh gaenq gwn saek donq haeuxbyaek ndat lai caeuq youzlauz lai seiz, ndaej doengzseiz senj gwn cungj daengz song cungj byaekheu、lwgmak daeuj guh doxdaengh, lumj gwn byaekmbungj、byaekbohcai、daeuh- fouh、makyungz、lauxbaeg nding daengj. Boux vunzbiz gaej gwn haeux lw byaek lw, engq mbouj ndaej dam gwn nohbiz.