Seizcou, vunzraeuz ciengz gamj- daengz miz mbouj doengz cingzdoh bak、ndaeng、naengnoh hawqsauj, ndigah, wng lai gwn di gijgwn raemx lai caemhcaiq ndaej seng raemx nyinh yaem he, noix gwn gijgwn manhget、gijgwn ciencaq. Gijgwn hab seizcou gwn haenx miz:

Beghab: Ndaej bouj bwt、nyinh bwt、cing sim an saenz、siucawz naetnaiq caeuq nyinh sauj dingz ae.

Maenzcienz: Mbouj ndat mbouj sauj, mboujlwnh saimbwk lauxcoz、miz bingh fouz bingh、ndang ndei ndang nyieg cungj hab gwn.

Ngaeux: Ngaeuxndip ndaej siu ndat seng raemx gaij hozhawq, ngaeuxcug ndaej cangq mamx sek dungx ik lwed.

Byalae: Haeuj cou gwn byalae, mboujdanh bouj ndang, lij ndaej diuzcez hezdangz ndang vunz dem, daet donh cauj、dwk raemx aeuq gwn、ronq baenz sei cauj gwn roxnaeuz cawj cuk gwn caemh ndaej.

Maklaeq: Ndaej cangq mamx ciengx dungx、bouj mak giengz ndok.

Duhdoem: Seizcou geizlaeng duhdoem henjcug, aeu duhndip ngenz mwnh heuz raemx gwn roxnaeuz baek raemx gwn, mbouj hab cauj gwn.

Makcauj nding: Seizcou gwn makcauj, ndaej nyinh yaem nyinh sauj, ik bwt bouj heiq, danghnaeuz caeuq raetngaenz、beghab、maenz- cienz doengzcaez aeuq gwn, yaugoj engq ndei.

Linghvaih, seizcou hab gwn makleiz、lwgcid、lauxbaeg nding、raetbingzguh、haijdai、makyungz、nohdouq, gwn bouj cix gwn vangzgiz、yinzsinh、sahsinh、ceh gaeujgij、hozsoujvuh daengj.