Diegcoj dwg aen mbanjiq seiqmienh cungj dwg bya he. Gaxgonq, geij gaiq naz iq caeuq geij gaiq reih ndaw bya, couhdwg daengx ranz vunz yungh daeuj ciengx mingh lo. Gij naz iq, faenbouh youq baihlaj gyoengq daemz iq, gwnz bya cungj dwg baenz gaiq baenz gaiq reih. Daj ndaw reih coh baihgwnz couh dwg gyoengq bya doxlienz caemhcaiq sang daemq mbouj doxdoengz, ndaw bya miz haujlai gofaex caeuq faexcaz. Gizneix seiq geiq gingjsaek mbouj doxdoengz, hoeng, gou ceiq maezlienh seizcou diegcoj.

Seizcou diegcoj, mbwn heu lumj gingq, sawngeuz caemhcaiq gyaeraez, ndit ronghndei youh huzswnh. Rumz seizcou biufefe, hawj vunz gig hab’eiq、cwxcaih, hawj vunz daengx ndang caeuq ndawsim cungj maez caez. Seizcou doek fwn gig noix, couhcinj mizseiz fwn doek roq doucueng, hix gamjdaengz singsing coeg rwz. Seiz iq dou youq gwnzdieg guh’angq, caen’da yawj nazhaeux henj lumj gim fan lumj langh nei, youq ndaw sing rwenz “lunglung” gihgi dajhaeux caeuq sing riu gyoengq beixnuengx, bienq baenz haeuxgok dak gwnz diegdangz、doi fiengz lumj goengq bya iq; caen’da yawj benq nazfaiq va hai ok faiq, doenggvaq song gaiq fwngz gyoengq beixnuengx mbaet ma le, bienqbaenz baenz daeh baenz daeh faiq mboeng, caiq gyagoeng baenz fan baenz fan moeg raeujrubrub; caen’da yawj moix gaiq reih ndaem gaeumaenz heusausau lumj goromj nyumx nei, ginggvaq song gaiq fwngz hwnj rim daw gyoengq beixnuengx vatgud, bienqbaenz baenz doi baenz doi maenzsauj gig hom gig ndeigwn he.

Bet nyied cibngux dwg aen ngoenzciet cozdungj daengx seizcou ceiq hoengh. Mwhhaenx, moix daengz ngoenzde, bohmeh cungj daj gwnzhaw cawx bingjhai dauqma, soengq mbangj hawj buz, soengq mbangj hawj daiq, dangyienz lij soengq di nohmou caeuq nohbya singjsien he dem. Haeuxbyaek ngoenzde daegbied lai, itbuen cungj ndaej gwn noh caeuq bya, mizseiz hix gaj gaeq gwn. Daengz gyanghaemh, meh couh rox riunyumnyum dwk ndenq hawj gou song aen bingjhai, hawj gou dawz bae caeq ronghndwen. Najranz miz benq dieg mbouj gvangq, ndaem miz go makmaenj haemz he. Haemhde mwnq dieg neix cungj comz daeuj haujlai vunz, daihgya doq gwn bingjhai homfwdfwd doq gangjgoj, gig sim’angq.

Seizcou diegcoj, mboujmiz ndoeng goraeu nding, mboujmiz vagut gyaeundei caeuq heiq homfwtfwt, mboujmiz suenmak dawzmak duiqnengneng，mboujmiz huzraemx fubfeb, hoeng, youq ndawsim gou, yienghneix cij caencingq gamjdaengz seizcou ceiq gyaeundei. Bya caeuq raemx gizneix hawj gou yienh ok gij gyaez ceiq caencingz, giet miz gij cingz gou ceiq caen!