“Vwnzgwz” doenghluenh buq- vaih ginghci Guengjsae, cujyau daej- yienh youq baih gunghyez. Bi 1967, daengx gih gunghyez canjciz beij bi 1966 doekroengz 8.97%, bi 1968 youh beij bi 1967 doekroengz 30.7%.

Sevei cizsi bienq cingqciengz le, dauqguh caeuq fazcanj couh baenz aenrap gig yienhda swcigih raeuz lo.

Bi 1969 nienzco, Veiz Gozcingh soujsien bae Liujcouh Si aen singz gunghyez lai gyonjcomz youq haenx guh diucaz. De ngamq daengz Liuj- couh seiz, gizde cingq youq ndaw bi cingq roengz ciengz nae daih’it, mbangj ngefaex cungj deng nae at goz lo. Goengdaeuz bonjdieg lwnh de nyi, baez doek nae neix dwg Liujcouh youq gwnz lizsij noix raen ndeu. Veiz Gozcingh riu naeuz:“Bi doek nae caijsoq ndei, bineix dwg bi ndei bw!”

Liujcouh Si bi 1967、bi 1968 song bi neix, aenvih souh “vwnzgwz” cunggik, dingzlai giyez dwg dingzcanj roxnaeuz buenqdingzcanj, daengx si gunghyez canjciz caeuq caizcwng souhaeuj, bi 1968 beij bi 1966 faen- bied doekroengz 68% caeuq 48%. Veiz Gozcingh iugouz gij goengdaeuz gwzveijvei ndaw si, nyinhcaen ciuq gij yenzcwz “gaem vanj raemx hawj bingz”, guh ndei hong song baij, siucawz gij gitgaz song baij, gyagiengz doxgiet, caezcienz gak gaep lingjdauj banhswj, gaem cingjdun giyez, dauqguh cizsi swnghcanj, gyagiengz guenjleix giyez, baengh gyoengq vunzhong caeuq gunghcwngz gisuz yinzyenz, dauqguh caeuq fazcanj swnghcanj. Danhfanz gij giyez hengzguh sam ban guhhong haenx, goengdaeuz caemh aeu baen sam ban doxlwnh bae cigban, yawhbienh gibseiz gaijgez gij vwndiz guhhong ndawde fatyienh haenx. De naeuz: Cijmiz dauqguh caeuq fazcanj swnghcanj, Liujcouh Si cij ndaej gaijgez caizcwng gannanz, gij gwndaenj vunzhong cij ndaej gaijndei.

Veiz Gozcingh bae Liujgangh cazyawj seiz, gij vunzhong cehgenh cingq coih luzfeiz, baet ciengzdieg, vih dauqcungz lienh faz guh ndei cinjbi. De caeuq gij goengdaeuz ndaw cangj nem gij vunzhong gyaudamz, ndaej rox Liujgangh siengj dauqcungz lienh faz lij miz haemqlai gannanz, mizmbangj gannanz gyoengqde gag gaijgez mbouj ndaej, aeu baengh swcigih bang- coengh caeuq dingjrengz cij baenz. sikhaek cingj swcigih mizgven bumwnz ngeixyaeng, fucwz gaijgez, hawj Liujgangh ndaej dauqcungz guh ndei swnghcanj.

(caengz sat)