Miz laeq lwgsai iq ndeu, baihlaeng ranz de miz benq ndoengfaex he, seiz miz rumz boq, mbawfaex ndaw ndoeng biu hwnj biu roengz, mizseiz biu haeuj gyangranz caeuq bakcauq de bae, yienghneix, boh de couh heuh de moix ngoenz baet seuq mbawfaex cij bae hwnjhag. Ranz ngamq rongh de couh hwnqdaeuj baet mbawfaex, baeg dahraix, daegbied dwg seizcou caeuq seizdoeng, mbawfaex lumj naeuz iekdingh ndei nei, cungj mboujduenh loenq roengzdaeuj. Baenzngoenz cungj aeu haujlai seizgan bae baet mbawfaex, laeq lwgsai iq neix gamjdaengz fanz lai. Doeklaeng de daj bouxwnq gizhaenx ndaej aen banhfap ndei ndeu, couh dwg yunghrengz ngauz gofaex hawj mbawfaex loenq liux cij baet, ngoenzcog couh mbouj yungh baet lo! Aen banhfap neix hawj laeq lwgsai iq neix gig angq, haet daihngeih de hwnqdaeuj gig romh, sien yunghrengz ngauz gofaex liux cij baet ranz, ngoenzneix baet couh dingj daengz ngoenzcog lo, ngoenzde de gig simhai. Ngoenz daihngeih, de youh hwnqdaeuj gig romh, byawz rox, daengz ndoengfaex gizhaenx yawj, vanzlij dwg mbawfaex rim gwnznamh, laeq lwgsai iq lawq lo……De soengz youq ndaw doi mbawfaex, sawqmwh siengj doeng gienh saeh he yawz baenz yienghneix——mboujlwnh ngoenzneix baenzlawz yunghrengz, ngoenzcog lij miz mbawfaex loenq roengzdaeuj! Seizhaenx, laeq lwgsai iq rox lo: Gwnzbiengz miz haujlai saeh mbouj ndaej guh gonq, seizneix miz hong, ngoenzngoenz miz hong cij dwg aen daidu doiq sengmingh ceiq caen bw.