Bouxvunz youq baihrog dwg bouxhek, moix daengz ngoenzciet engq- gya niemh vunzcaen.

Bouxvunz youq baihrog, moix daengz ndwencieng roxnaeuz ngoenzciet cungj siengjniemh vunzranz, lij lai miz faenh siliengz ndeu. Miz geijlai baez, bouxyouz youq haemh bet nyied cibngux, gig godan caemhcaiq gig camjdamh.

Bouxvunz youq baihrog, ndawsim niemh diegcoj, faenh gamjcingz doiq diegcoj nanz cuengq ndaej roengz. Daengz ronghndwen daj gwnz haij menhmenh swng hwnjdaeuj, ndaw siengjniemh cungj raen miz rumz、fwj、fwn、bya、dah caeuq vunz diegcoj.

Bouxvunz youq baihrog, byaij gwnz byaij laj, biu bae biu dauq, mbouj miz giz dingz din, najdoiq daengxbiengz gig najseng neix, geijlai haemh lumj haemhneix miz rumz seizcou cifedfed. Geijlai aen bet nyied cibngux, geijlai haemh, simnaiq seiz, cijnaengz doiq ronghndwen daejdwk, gaem boi laeuj youq henzcueng gag ndoet……

Youh daengz bet nyied cibngux lo. Aen ronghndwen gig nduen, yaep he okdaeuj yaep he ndoj laeb fwj, bouxyouz youq lajmbwn gag bouxvunz dog, vangq yawj ronghndwen. Mboujlwnh gingjsaek geijlai gyaeundei, cungj goemq mbouj ndaej faenh siliengz ndawsim bouxyouz.

Lix dwg vunz diegcoj, dai baenz hoenz diegcoj. Youq baihrog dwg bouxhek, caenhguenj gaenq gwn raemx diegrog gvenq, cimz caz diegrog caez, hoeng, mboujguenj diegrog caiq ndei, cungj daiqlawh mbouj ndaej bouxyouz gyaez diegcoj caemhcaiq niemh dieg- coj.

Bouxvunz youq baihrog, daengz ndwencieng caeuq ngoenzciet cungj rox siengj daengz bohmeh、beixnuengx、baengzyoux seiziq doxcaemz, siengj- niemh gij bya caeuq dah diegcoj caez.