Saehcingz gvaqbae 20 lai bi le, boux dungzci bingdoih youq baez dingjlingz gihvei ndeu, caeuq bouxraiz gangj gij goj de bi 1973 ndwen 8, dwen daengz de caeuq boux canyouj daj Swconh、Gveicouh daeuj Guengjsae banhsaeh seiz ndaej caen da yawjraen caeuq caen rwz dingq naeuz haenx hawj bouxraiz:“Seizde, Swconh、Gveicouh lij haemq luenh, gunghawj caemh yaez, baez haeuj daengz Guengjsae couh mbouj doengz lo, sevei cizsi haemq ndei, gunghawj caemh ndei. Dou raen mbouj noix vunzguhnaz Gveicouh caenx haeuj cifeiz, baez daengz Guengjsae gak aen camh couh faenfaen roengzci, gyoengqde dwg daeuj rumh gwn haeux. Mizmbangj bouxhek cifeiz naeuz dou nyi, Gveicouh gvaqdaeuj vunz ngoenz lai gvaq ngoenz, cwngfuj dangdeih cawz hawj gyoengqde gwn haeux le, lij soengq di haeux hawj gyoengqde dawz baema ranz. Raeuz dingq le haemq gamjdoengh, Guengj- sae seizde hingzsi caen ndei dahraix.”

70 nienzdaih co, daengx guek mbangj swngj、si doiq diemjsim、bingjgan、begdangz daengj fusizbinj bujben saedhengz baengh biuq gunghawj, Guengjsae dwg goenghai gai. Seizde, miz goeng ginghci yozgyah daeuj Gveilinz okcai, de doiq boux lingjdauj diveij Gveilinz naeuz, de youq Guengjsae fatyienh gienh saeh gvaiq ndeu, couhdwg gwn faenj caeuq youzdiuz mbouj yungh liengzbiuq.

Seizde, youq gwnz hawciengz Guengjsae, hix seizbienh cawx ndaej gij nohmou mbouj yungh biuq haenx, Guengjdoeng ciengz miz vunz daeuj daengz Vuzcouh cawx nohmou roxnaeuz duzgaeq、duzbit daengj fusizbinj baema ranz.

Aenvih geij bi de Guengjsae nungzyez guh ndaej onjdingh fazcanj baenaj, gij fusizbinj ndawsingz gunghawj haemq ndei, caiq gangj sevei beij gizwnq onjdingh, mbangj hoih yezvu daengx guek cungj haengj daeuj Guengjsae hai, dijyuz conh- yezdui caemh aen doek aen daeuj daengz Guengjsae comz lienh. Haihoih caeuq comz lienh sat le, haujlai vunz cungj haengj cawx di begdangz caeuq fusizbinj baema soengq hawj beix- nuengx baengzyoux.

(caengz sat)