8 nyied 22 daengz 24 hauh, daihgouj gaiq daengx guek caz vamaedlaeh gyauhyiz bozlanjvei、 bi 2015 Cungguek(Hwngzyen) ciet vamaedlaeh vwnzva youq Hwngzyen gawjbanh. Hoihciet geizgan vwnzva hozdung ndei yawj dangqmaz, minzsuz yienj ok gig miz daegsaek minzcuz, gizgiz cungj yienjok gij heiqfaenh gvaq ciet he.

8 nyied 23 hauh banhaet, gij minzsuz funghcingz youz Hwngzyen canghheiq bonjdieg ndawbiengz biujyienj haenx gig ndeiyawj, fatyiengz le daegsaek minzcuz vwnzva, vih gyoengq hekyouz yienj yisuz vwnzva conzdungj caeuq fungsug Hwngzyen. Fouxlungz、 vwnzyi yienjok daengj hozdung ndei yawj yinx ndaej gyoengq hekyouz lwgda yawj dwk cungj mbouj yaep, yienhciengz gig nauhyied.

8 nyied 23 daengz 24 hauh geizgan, gij cezmuz minzsuz ndawbiengz youz canghheiq Hwngzyen bien yienj haenx, youq Hwngzyen Hwngzcouh Gunghyenz、 Haijdangz Gunghyenz、 suen vamaedlaeh Cunghvaz mbouj doengz seizgan okcunz yienjok. Youq seiz minzsuz vwnzva cezmuz biujyienj, foux、 fwen bonjdieg, ndaej daengz bouxyawj bekfwngz haenh ndei.

(Cinz Siujdauh/覃小涛）