De nyinhnaeuz, canjlieng haeux- gwn wnggai aeu gij soq baen hawj swnghcanjdui haenx guh cinj, youz dungjgi bumwnz gyonjcomz bauq hawj baihgwnz. Gij soq youz dungjgi bumwnz fanjyingj dwg mbouj dwg saedcaeq, caemh aeu yawj gij gyaq haeux hawciengz bimoq caeuq gij cingzgvang vunzlai anbaiz gwndaenj le cij guh dinghlwnh. Gyoengq cangzveij dangjveij swcigih cungj doengzeiq gij naemjfap de. Yienghneix, cangzveij binaengz doxlwnh bauq gij canjlieng haeuxgwn swcigih hawj baihgwnz seiz, cungj miz itdingh hoengqyawz.

Guengjsae bi 1969 daengz 1975 nienz ndaw 7 bi de, caenhguenj bibi cungj miz mbouj doengz cingzdoh swyenz caihaih, hoeng nungzyez swnghcanj hingzsi gig ndei. Haeuxgwn lienzdaemh 7 bi daih demcanj, bingzyaenz moix bi demcanj 60 fanh dunh doxhwnj. Bi 1975, daengx gih haeuxgwn canjlieng daddaengz 1126. 85 fanh dunh, ciuq gyaeujvunz nungzyez daeuj suenq, moix vunz bingzyaenz ndaej 783 gaen. Gooij、youzliuh、goyaed、goien、gomak、mbawcaz daengj doenghgogai caeuq cukseng、doxgaiq ndaw raemx、doxgaiq ndaw ndoeng, cungj ndaej daihliengh demcanj.

Gij hingzsi ndei Guengjsae guh nungzyez haenx, daengx guek cungj goengnyinh. Daengx guek cwnghez fucujsiz Cienz Cwngyingh bi 1990 daeuj daengz Guengjsae cazyawj seiz dwen gvaq gienh saeh ndeu: Bi 1970 ndwen 3 ciuhai baez hoih daengx guek hong giva haemh doekgonq, Yiz Ciuhlij dungzci bae ra gyoengqde geij boux dungzci raiz vwnzgen haenx, naeuz youq aen fuengmienh nungzyez, yaek aeu biujyangz aen swngjgih ndeu, doeklaeng ngeixyaeng gvaq le gietdingh biujyangz Guengjsae raeuz.

Bi 1973, Gveicouh aenvih mbwn caeuq sevei daengj yenzyinh mbouj onjdingh, nungzyez swnghcanj souh- daengz yingjyangj haenq, haeuxgwn gemjnoix haenq, gij vunz dep youq henzbien Guengjsae haenx naengh cifeiz daengz Ginhcwngzgyangh daeuj guh gaujvaq. Veiz Gozcingh mingzgoz daengq naeuz: Doiq gyoengqvunz daeuj guh gaujvaq rumh gwn haenx, aeu hawj gyoengqde haeux gwn, hawj gyoengqde raemx ndoet; haeujsim vunzvaih nauhsaeh, refuengz binghlah; bouxboux cungj soengq di haeuxgwn, dungyenz gyoengqde baema gauj swnghcanj. Dangdieg cwngfuj laemz- seiz laebbaenz “camhsouyungz” daeuj banhleix gienh saeh neix, Veiz Gozcingh naeuz, gaej heuh guh “camhsouyungz”, wnggai gaij guh “camhdakdaih”. Doeklaeng, vunz yied daeuj yied lai, vanzlij daj Ginh- cwngzgyangh roenx bae daengz Liuj- couh dem, doiq gyaudoeng caeuq sevei onjdingh yingjyangj haemq daih. Ciuq gij yigen Veiz Gozcingh, gyoengq cangzveij dangjveij ndaw gih ngeix- yaeng, doengbauq cingzgvang hawj Gveicouh Swngj, doengzseiz cawj- doengh soengq bae 2000 fanh gaen haeuxgaicawx, bang Gveicouh gaijgez gij gannanz camhseiz bungz daengz haenx. Veiz Gozcingh lij daengq naeuz, aeu soengq haeuxndei, aeu yinh bae vaiq.

(caengz sat)