Ndaw binghfuengz yihyen miz song boux vunzbingh caemh youq, boux ndeu daj ndawsingz daeuj, boux he daj lajmbanj ma, song boux de ngamjhab baenz doengz cungj bingh ndeu. Boux vunzbingh ndawsingz moix ngoenz cungj miz haujlai caencik caeuq baengzyoux daeuj damq de. Vunzranz naeuz：“Saeh ndawranz mwngz mbouj yungh causim, gijmaz cungj ndei caez……” Baengzyoux naeuz:“Seizneix mwngz gijmaz doq mbouj yungh siengj, cijguenj ansim ciengx ndang couh baenz lo.” Boux vunz danhvei baij daeuj haenx nai naeuz:“Mwngz cuengqsim, saeh danhvei dou cungj bang mwngz anbaiz ndei lo, seizneix gij hong mwngz couhdwg ansim ciengx ndang.” Hoeng, vunzbingh lajmbanj cij miz daeg lwgsai he ndaej cibngeih sam bi yienghneix daeuj buenx de, yah de cib ngoenz roxnaeuz byongh ndwen cij daeuj baez ndeu, yah de daeuj mbouj dwg soengq di ngaenz couhdwg dawz geij geu buhvaq daeuj, baez daeuj couh gangj neix gangj haenx, heuh gvan de dawz cawjeiq:“Yaek cimqceh lo, seizneix haeuxceh gyaj lai, wnggai cawx gijmaz haeuxceh ne?” “Song ngoenz dem, bohlungz yaek haq lwgmbwk lo, soengq geijlai ngaenzlaex ndei?” “Dahmeiz yaek riengz biujcej caemhdoih bae dajgoeng, gou mbouj doengzeiq, mwngz daeuj gietdingh ba.” Gvaq geij ndwen, boux vunzbingh ndawsingz dai bae lo, vunzcaen daejnga’nga, hoeng, vunzbingh lajmbanj dauqfanj lix roengzdaeuj, aenvih vunzranz lij liz mbouj ndaej de……