8 nyied 14 hauh banhaemh, Yungzanh Yen Fouzsiz Cin Fouzsiz Segih vwnzyidui haj cejnuengx Bouxcuengh singq Cinz haenx youq Fouzsiz Cin vwnzdij cungsim gvangjcangz gawjbanh geiqniemh dingjhoenx ndaejhingz 70 hopbi vwnzyi vanjvei.

Vanjvei geizgan, gyoengq yenjyenz biujyienj 《Daihhabciengq Dahvangzhoz》、 foux 《Yingjsanhhungz》、 gagciengq《Daegngeih Langh Vaiz》、 go foux《Gwnz Dahsunghvahgyangh》、 《Caxhung Cinhingzgiz》 daengj 12 aen cezmuz, yienj gij cezmuz ndei yawj ndaej daengz bouxyawj bekfwngz haenh ndei.

Ciuq cam rox, aen“vwnzyidui haj cejnuengx singq Cinz” neix youq Fouzsiz Cin beizyangj le haujlai vunz vwnzyi maenhndei, gyoengqde aeu gij dingqnyi yawjraen henz ndang guh daez, aeu “bouxguhnaz sij, sij bouxguhnaz, bouxguhnaz yienj, bouxguhnaz yawj” guh yenzcwz, yungh caijdiu、 gagciengq、 siujbinj daengj lai cungj hingzsik bouxyawj maij yawj gyaez dingq haenx yienj okdaeuj hawj vunz yawj, vunzlai haengjgyaez dangqmaz.

(Veiz Cujswz/韦祖祠)