Ciuq gij yigen Veiz Gozcingh, swcigih daj bi 1970 hwnj, binaengz ciuq gij vwndiz guhhong saedcaeq lajmbanj daezok haenx, dingh’ok le mbangj gidij cwngcwz. Deng “swix” vanzging yingjyangj lajde, caenhguenj mizmbangj cwngcwz gvidingh mbouj dwg haemq caezcienz, hoeng gyonj daeuj gangj, dingzlai lij dwg habhoz gij saedcaeq Guengjsae raeuz. Neix doiq diuhdoengh vunzguhnaz hwnj- heiq guhhong, coicaenh lajmbanj fazcanj ginghci, haemq miz cizgiz cozyung. Beijlumj, ciengx mou ne, cwngcwz gvidingh cawz baen gij dieggaglouz hawj seyenz le, lij baen ndaej gij dieg ndaem byaek ciengx mou dem. Doiq baijcawx mouseng, miz vunz cawjcieng yungh cienzbouh cawx liux aen fuengfap neix, caemh miz vunz naeuz yungh “cawx duz louz duz” aen fuengfap neix. Veiz Gozcingh caeuq geij boux fucwz dungzci cungj doengzeiq aen fuengfap daihngeih. Gvidingh guekgya cawx duz ndeu, cawz ciuq gij gyaq cawx gvidingh hawj ngaenz le, lij habdangq hawj di haeuxliengz bangbouj ranz guengciengx, duz louz roengzdaeuj haenx, ndaej gaj daeuj gag gwn, caemh ndaej dawz bae gwnzhaw gai. Seizde, gyaqcienz noh gwnzhaw sang gvaq gyaqcienz cawx moundwn, aenvih “cawx duz louz duz” cungj cwngcwz neix gaijgez mauzdun lai ndei, ndigah Guengjsae ciengx mou itcig ngoenz hoengh gvaq ngoenz. Bi 1975, daengx gih ndaw riengh miz mou 1209 fanh duz, mauhgvaq 1965 nienz 475 fanh duz. Youq vunz ndawsingz baengh biuq cawx noh aen nienzdaih haenx, gij gvidingh neix doiq coicaenh mouseng fazcanj, baujcwng hawciengz gunghawj noh, miz cozyung gig youqgaenj.

Ngamq laebbaenz Swcigih Gwz- veijvei seiz, haujlai nungzyez gohyoz gisuz yinzyenz aenvih cinghgenj gih- gou deng lizhai nungzyez gangjvei bae lo. Anh Bingzswngh boux gaemguenj nungzyez neix cawjcieng naeuz, gij vunz haenx daj yenzcwz baihgwnz cungj yaek aeu gvidoih. Veiz Gozcingh haemq doengzeiq gij yigen haenx. De gangj, gak yienh doenghbaez laeb miz aencamh doigvangq nungzyez gisuz、aencamh ywbingh doihduz、aencamh gai haeuxceh、 aencamh yawhcaek yawhbauq binghnon、aen nungzcangz sanjciengx liengzcungj roxnaeuz nungzyez gohyoz yenzgiusoj daengj gihgou, doiq doigvangq senhcin gisuz, fazcanj nungzyez, yaugoj gig ndei. Seizneix yaek dauqcungz hengz- guh caeuq caezcienz gij gihgou neix hwnjdaeuj, cungfaen fazveih gij cozyung gisuz yinzyenz. 70 nienzdaih cogeiz, daengx gih mizmbangj swngh- canjdui gaenq cungbyoengq gij geiq- loeg haeuxsongmiuz bingzyaenz moux 2000 gaen haeux、 miuzdog couh sou ndaej 1300 gaen haeux, mbangj swnghcanjdui gaenq rox gamhanh seizcin ganq gyaj mbouj naeuh caeuq rox gamhanh doenghgo mbouj fatseng binghnon. iugouz, nungzyez gohgi gunghcozcej roengz gij swnghcanjdui neix bae, caeuq vunzlajmbanj caez guhhong, cungjgez gij gingniemh senhcin gyoengqde, youq gwnz mienh lai doigvangq. Gyoengq nungzyez gohgi yinzyenz youq lajmbanj daih yienj bonjsaeh, doiq fazcanj nungzyez guh ok cingzcik gig daih.

(caengz sat)