Miz song boux vunz doek raemx, boux ndeu siliz gig ndei, boux ndeu dagaenhyanx. Song boux neix youq najraemx diuz dah gvangqlangh haenx cakdai, yaep ndeu couh mbouj miz rengz lo. Sawqmwh, boux siliz ndei de yawjraen baihnaj miz “aen ruz iq” ndeu cingq vad daeuj coh song de. Boux dagaenhyanx hix mumjgyumq yawjraen lo. Yienghneix, song boux de couh yunghrengz youz gvaqbae coh “aen ruz iq”.

Youz yaep ndeu, boux siliz ndei de couh dingz roengzdaeuj, aenvih de yawj ndaej gig cingcuj, aen de mbouj dwg aen ruz iq, dwg donh faexnduk ndeu. Hoeng, boux dagaenhyanx mbouj rox de dwg donh faexnduk, ndigah de lij yunghrengz coh baihnaj youz bae. Mwh de youz daengz henz de seiz, rox de gingqyienz dwg donh faexnduk he, seizde, de hix youz daengz gyawj haenzdah lo. Boux siliz ndei de couh yienghneix mboetdai youq ndaw dah, hoeng, boux dagaenh- yanx dauqfanj mbouj dai.

Miz song boux vunzbingh baenz aizcwng. Boux ndeu rwz ndei, de dingqnyi canghyw gangjvah naeuz de ngamq gyaeu ndaej sam ndwen. Yienghneix, de baenzngoenz mbouj haisim, doeklaeng mbouj daengz sam ndwen couh dai lo. Lingh boux rwz miz di nuk, gaej naeuz laeglemx dingq canghyw gangjvah, couh dwg mwngz doq goekrwz caeuq de gangjvah, de lij dingq mbouj cingcuj geijlai. Siengj mbouj daengz de sad lix gvaq sam ndwen, daengz seizneix gaenq gvaqbae song bi lo, de lij caengz dai.

Youq Meijgoz, miz song aen gunghswh hung doxdoengz, gyoengqde bouxcungjcaiz ndeu heuhguh Lozbwz- dwz, boux ndeu heuhguh Sijdifuh. Lozbwzdwz coengmingz youh rox suenq, gijmaz saeh cungj beij bouxwnq yawj ndaej gyae. Aenvih de caeux couh yawhsuenq daengz youq 2008 nienz Meijgoz miz gimyungz veizgih, ndigah de gietdingh gaijsanq gunghswh, lij ndaej di ngaenz hawj swhgeij caeuq vunzgoeng yungh, mbouj yienghneix guh daengz mwhde itdingh yiemqcaiq haujlai. Aenvih de faensik daengz, youq 2008 nienz, Meijgoz miz 30% gunghswh yaek gvendou, aen gunghswh de yienghneix iq, itdingh youq ndaw 30% dauq- ndaw.

Sijdifuh yawj hwnjdaeuj mbouj beij de rox suenq, lij miz di ngawz dem. De gag nyinhnaeuz, ciengxlwenx yawhsuenq mbouj ndaej ok daengz- cog, couhsuenq mwngz dawz faenh giva ceiq ndei coq youq baihnaj de, de hix mbouj siengsaenq, aenvih daengz- cog lij caengz caencingq daeuj daengz. De nyinhnaeuz aen gunghswh de ngoenz ndeu mbouj gvendou, de couh itdingh cengj roengzbae. Doeklaeng, aen gunghswh de gingqyienz doh gvaq le ciengz seiqgyaiq gimyungz veizgih neix. Doeklaeng, boux vunz rox suenq haenx dawz gunghswh gaijsanq, hoeng, boux vunz mbouj rox suenqgeiq haenx aen gunghswh de beij mwhgonq guh ndaej engq hoengh.

Ndaw seiqvunz haujlai saeh, mbouj rox beij rox ndei, mbouj lingzbienh beij lingzbienh ndei, mbouj coengmingz beij coengmingz ndei. Neix couh dwg vunzraeuz ciengzseiz gangj bouxvunz nanz ndaej moengj- doengj. Gizsaed, seiqvunz bonjlaiz couh dwg moengjdoengj, sojmiz vaiqvued caeuq vuenyungz cungj bomz youq ndaw moengjdoengj, saekseiz cingsingj le, sojmiz vaiqvued caeuq vuenyungz hix couh mbouj raen ngaeuz lo!