Mwh lij iq, de dwg boux lwgnyez manzgaengq ndeu, bin faex mbon gyaeqroeg, roengz dah gaeb nyauh, mbouj dwg diuz vaq sik bae vengq ndeu, couhdwg geu buh byoengq aen congh hung he, boh de yawjraen le cix mbouj dub de gvaq. Lij riuhaha dwk ndij meh de gangj:“Lwgnyez ha, cungj yienghneix, gou mwh lij iq hix dwg yienghneix.”

Hoeng, miz baez ndeu, de caeg ranznden 5 maenz ngaenz. 5 maenz ngaenz youq dangseiz gaenq mbouj dwg noix 1o. Boh de rox le, couh aeu sainaeng cug de hwnj gwnz faex bae, haenqhaenq dwk fad de geij bien. Doq fad doq ndaq:“Lij iq caeg cim, hung le caeg gim, baezlaeng caiq caeg, gou couh daet fwngz mwngz bae.” Baezde, de deng boh de fad dwk daengxndang noh sik naeng laij, meh de yawjraen le gig siengsim, naeuz boh de fad haenq lai, ndij boh de doxceng le couh daiq de dauqbae ranzdaiq lo. Baezde, boh de mbouj lumj baezgonq bae ranzdaiq ciep de caeuq meh de dauq ranz, seizde de cij rox, guhcaeg boh de ceiq haemz lo. Daengzlaeng de caiq hix mbouj gamj bae caeg lo! De lau boh de gangj daengz couh guh daengz, caen daet fwngz de bae dahraix.

Daengz de ndaej 9 bi mwhde, de daiq daegnuengx 6 bi bae ranzdaiq, ngoenzde ndaw mbanj yahdaiq cingq- ngamj cuengq denyingj, de caemh daiq daegnuengx de bae yawj, yawj daengz byongh, de ra dieg bae ok nyouh, doeklaeng dauqma ranz mbouj raen daegnuengx dauqma. De naemj, daegnuengx gojnwngz caeuq vunzsug caemhdoih baema ranz lo, couh mbouj cuengq haeuj sim. Cigdaengz ngoenz daihngeih de dauqma ranz, mbouj raen daegnuengx de, de simsaenz lo, daengx ranz vunz okbae ra daeg- nuengx, hix ra mbouj raen. Nyex ok huxhung lo, boh de itdingh yaek dub de can ndeu haenqhaenq bae, hoeng, boh de mbouj gangj saek coenz vah.

Daegnuengx couh lumj diuzcenx nei, saek youq ndaw hoz de, de mbouj dwen, bohmeh de hix mbouj dwen. Hoeng, de rox, bohmeh de cungj siengjniemh daegnuengx, daegbied dwg gyoengqde yied daeuj yied geq lo, siengjniemh daegnuengx ngoenz beij ngoenz haenq. Hoeng, bohmeh soqlaiz cungj mbouj gvaiq de gvaq. Gizsaed, de muengh boh de dub de can ndeu, couhcinj dub daengz ndok raek, de hix mbouj ienqhoij.

Ra daegnuengx mbouj raen daih 26 bi, de yawj Cunghyangh Densidaiz aen cezmuz ra vunzcaen ndeu, cij youh miz di maqmuengh he. Doeng- gvaq cezmuzcuj lai giz bae ra, doeklaeng ra ndaej raen daegnuengx saetsanq 26 bi de dahraix. Seizde, ndaek rin daenz youq ndaw sim de dauqdaej doek roengzdaeuj lo! Youq cezmuz yienhciengz, boh de itcig raemxda rihsoegsoeg. Bouxcujciz cam boh de:“Daegnuengx mbouj raen lo, mwngz dub daegbeix de lwi?” de giendingh dwk naeuz:“ dub gvaq.” Bouxcujciz cam vihmaz mbouj dub. Boh de han naeuz:“Daegnuengx mbouj raen le, de ndawsim gig nanzgvaq. Dou gaenq mbouj raen boux lwgnyez ndeu lo, dou wnggai gyaboix dwk gyaez daegbeix de.”

Seizde, de raemxda doek rim naj caez. Daxboh dub de, dwg aenvih gyaez de, lau de guh yak hengz vaih, byaij hwnj diuzroen vaih bae; hoeng, boh mbouj dub, hix dwg aenvih gyaez de, dub naeuz mbouj dub, dauhleix doxdoengz.

Boh de dub naeuz mbouj dub, cungj dwg ciengxlwenx gyaez de.

Boh

Mbouj