Ndaem gomiuz, bouxboux cungj rox, mboujgvaq, sou itdingh caengz dingq gangj gvaq ndaem dangznaed ba? Gangj okdaeuj mbouj lau sou riu, gou couh guh gvaq cungj saeh huk neix.

Seizhaenx gou cij ndaej 5 bi. Ngoenz ndeu, daxboh daxmeh daiq gou bae ranz daxdaiq, byaij gvaq henz nazreih, gou yawjraen daxdaiq cingq ndaem duhhenj. Banngaiz gvaq, daxmeh cauj duhhenj hawj gou gwn. Gou itmienh miz feih gwn dwk, itmienh geizheih cam:“Daxdaiq, duhhenj dwg baenzlawz daeuj?” “Youq ndaw reih ndaem ha!” Daxdaiq riu naeuz. Gou youh cam:“Moix yiengh gijgwn cungj ndaej ndaem okdaeuj lwi?” “Dwg ha.” Daxdaiq haengjdingh dwk han gou. Gou dingq le, sim’angq raixcaix, caegcaeg geiq youq ndawsim lo.

Ngoenz daihngeih gyanghaet, daxmeh daiq gou dauqma. Loh gvaq aen diemq gai gijgwn seiz, gou ngaeq daxmeh cawx dangznaed hawj gou gwn, daxmeh mbouj haengj, hoeng ceng mbouj gvaq gou.

Ma daengz ndaw ranz, gou naengh youq gwnz sahfaz gwn dangz. Gou lij geiq ndaej gij vah daxdaiq gangj haenx, gou itmienh gwn dangz itmienh siengj, danghnaeuz gou aeu dangznaed ndaem roengz lajnamh bae, gou couh ndaej gwn haujlai dangz lo. Gou gwj siengj gwj siengj, nyaenx mbouj ndaej riu hwnjdaeuj lo. Gwn dangz sat le, gou couh gaem geij naed dangz buet ok bakdou, dawz de ndaem youq ndaw namh henz suenbyaek. Gou itmienh ndaem itmienh siengj: Maj ok faexdangz, gou couh ndaej ngoenz- ngoenz gwn dangz lo. Va! Geijlai ndei ha! Vih aen simnyienh neix, gou ngoenzngoenz rwed raemx﹑soeng namh﹑dwkbwnh, hoeng haujlai ngoenz gvaqbae lo, dangznaed lij caengz didngaz, gou simgip raixcaix, vat roengz namh bae yawj, ya! Neix dwg vih gijmaz? Dangz cungj bienq ndaem lo, lij miz heiqhaeu dem. Itdingh dwg daxdaiq yaeuh gou lo.

Doeklaeng, dou youh bae ranz daxdaiq. Baez yamq haeuj bakdou gou couh hemq:“Daxdaiq, mwngz yaeuh gou, mwngz caen vaih!” Daxdaiq mbouj rox gou gangj gijmaz saeh, umj gou hwnjdaeuj cam:“Baenzlawz la? Dahlan gou!” Gou hozndat dwk dawz gienh saeh ndaem dangz lwnh hawj daihgya nyi. Daihgya dingq le, bouxboux cungj riuhaha hwnjdaeuj. Daxdaiq nyaenx gij riu naeuz:“Naeddangz mbouj miz sengmingh, ndaem mbouj ndaej.” Gou dingq le buenq saenq buenq ngeiz, lumj mingzbeg youh lumj mbouj mingzbeg dwk ngaekngaek gyaeuj.

Seizneix, gou gaenq hwnj haj nienzgaep lo, roxsaeh haujlai, caiq hix mbouj guh gvaq cungj saeh huk haenx lo, hoeng moix dang dauqngeix hwnj gienh saeh neix seiz, gou couh nyaenx mbouj ndaej goemq bak gag riu.

（指导老师：李小里）