Riengzdwk bi’ndwen ciemh ngoenz ciemh geq, gai ndaw ndok bouxlaux hix sied bae lai lo, haujlai bouxlaux baenz laeng gongz、hwet naet laeng in、ok hanhheu daengj bingh.

Seizhah dwg aen geiqciet ndei bouxlaux bouj gai ndeu, mboujdanh ndit ciuq doh, daenj buhvaq noix, giz naengnoh lohgangh lai, giz ndit ciuq daengz lai. Naengnoh ginggvaq ndit ciuq le, ndaw ndang couh canjseng veizswnghsu D, mizleih supsou gai. Linghvaih, ok rog ranz hozdung haemq lai, hozdung caeuq lienhndang ndaej demgya goetndok danzsingq caeuq nyinznyangq, ndaej gaijndei roxnaeuz gemjmbaeu baenz ndok soeng ndok byoiq.

Bouxlaux bouj gai dwg daj ndaw gijgwn bae bouj, wng lai gwn gijgwn hamz gai sang haenx, lumj byuk nyauh、nohcing、byaekbohcai、gij huq aeu duh guh、gij huq aeu cij guh; mbangj bouxlaux mbouj naih ndaej raemxdangz, gwn cijvaiz le okyienh dungxsiq、aek ciengq daengj bingh- yiengh, cungj bouxlaux neix ndaej senj gwn cijsoemj、gienghduh; mbangj bouxlaux gwn gienghduh le okyienh aek ciengq, cungj vunz neix ndaej senj gwn gij gienghduh aeu cungj duh wnq daeuj guh haenx.

Miz vunz nyinhnaeuz, ciengq lwgraz dwg gijgwn bouj ceiq ndei, gizsaed cungj ciengq neix hamz miz daihliengh youzlauz, bouxlaux baenz hezyaz sang、bouxlaux baenz gvanh- sinhbing、bouxlaux baenz bingh- nyouhdangz mbouj hab gwn. Caiq gangj, ngoenz gwn gai 1000 hauzgwz couh ndaej, mwh gwn haeux seiz gwn yaugoj ceiq ndei.

Linghvaih, yindung doiq gaijndei ndok soeng ndok byoiq cibfaen youqgaenj, bouxlaux ngoenznaengz aeu ok rog ranz bae guh yindung it daengz song diemj cung, okbae youzbyaij、dwk daigizgenz roxnaeuz bin bya、buet caemh ndaej. Doeklaeng, bouxlaux moix ngoenz aeu baujcwng dak ndit 30 faen cung, ndaej senj youq gyanghaet 9 daengz 10 diemj、lajbyonghngoenz 3 daengz 4 diemj okbae dak, gizwnq seizgan yungzheih deng dak sieng roxnaeuz fatsa.