Bouxlaux baenz uk roenx lwed lai. Neix dwg aenvih hezyaz raemhrwnh swng sang, hawj diuz sailwed iq dekleg yinxfat baenz uk roenx lwed.

Baez raen vunz uk roenx lwed le, vunz ndaw ranz wng ciuq banhfap baihlaj bae gipgouq:

Baujciz caemcingx, hawj vunzbingh ninz daengjai bingz, gyaeuj ngeng gvaq henz bae, fuengz lwed caeuq huqrueg sup haeuj hozgyongx bae.

Gej gaetbuh saivaq ok, baujciz ndaw rug doeng rumz ndei, seiznit aeu haeujsim bauj raeuj, seizndat aeu haeujsim siu ndat, yungh sujbaq dumz baeng najbyak, aenvih sailwed bungz gyoet rox sousuk, ok lwed noix di.

Youq gwnz roen bae yihyen, aenci aeu baujciz bingzonj, noix saenqdaenh; loq daiz aen’gyaeuj vunzbingh hwnj, caemhcaiq haeujsim binghcingz bienqvaq.